Ka nisur në Gjykatën e Tiranës gjyqi mes Shkëlzen Berishës, djalit të ish-kryeministrit Sali Berisha, dhe kreut të grupit parlamentar socialist, Taulant Balla.
Berisha ka paditur Ballën për shpifje dhe pas dështimit të seancave të pajtimit, çështja ka kaluar në gjykatë.
Gjatë punimeve të komisionit hetimor parlamentar për CEZ, Balla akuzoi Shkëlzen Berishën se nuk kishte paguar taksat prej disa vitesh, ndërsa i bëri thirrje Prokurorisë që ta hetojë dosjen “CEZ” me seriozitetin më të madh, përfshirë edhe rolin e djalit të ish-kryeministrit në privatizimin e OSSH te kompania çeke.
Në një prononcim të shkurtër për mediat, Shkelzën Berisha tha se priste që gjykata të bënte drejtësi dhe të dënonte Taulant Ballën për shpifje.
“Shpresoj që gjykata të vërtetojë shpifjen e radhës këtë herë penalisht për z.Balla”, tha Shkëlzen Berisha.
Vetë kreu i grupit parlamentar socialist nuk ka qenë i pranishëm në seancën e parë gjyqësore që u zhvillua sot te Gjykata e Tiranës.
