Sekretari i Përgjithshëm Gazmend Bardhi njofton se Enkelejd Alibeaj do të jetë kryetar i ri i PD:
“Pasi jam njohur me deklaratën e Kryetarit të Partisë z. Lulzim Basha se ka vendosur të hedhë një hap pas duke u dorëhequr nga detyra e kryetarit të PD për të ndihmuar në ringritjen e PD, kam thirrur në një takim urgjent pune për të diskutuar për situatën Nënkryetarët e Partisë znj. Jorida Tabaku dhe z. Enkelejd Alibeaj, si dhe Kryetaren e Këshillit Kombëtar të PD znj. Arta Sakja.
Në mbështetje të Statutit të Partisë dhe për të mos krijuar asnjë vakuum në drejtimin e Partisë në këtë moment të vështirë dhe specifik, kam konsultuar të dy Nënkryetarët me qëllim paraqitjen për zgjedhjen menjëherë nga Këshilli Kombëtar të komandimit të njërit prej tyre për drejtimin e Partisë.
Në takim kam marrë konfirmimin e Nënkryetares znj. Tabaku se heq dorë nga e drejta statutore për t’u propozuar në Këshillin Kombëtar për drejtimin e Partisë. Për pasojë, në përputhje me nenit 46 të Statutit, drejtimi i partisë në këtë periudhë tranzitore, deri në vendimmarrjen e institucioneve të partisë, do të behet nga Nënkryetari i Partisë dhe Kryetari i Grupit Parlamentar z. Enkelejd Alibeaj.
Në një prononcim për mediat Enkelejd Alibeaj, ka bërë të ditur se Grupi Parlamentar vlerëson dorëheqjen e Lulzim Bashës dhe kërkon që të ndiqet i njëjti mekanizëm për ish-liderin Sali Berisha.
“Grupi Parlamentar vlerëson aktin e dorëheqjes së kryetarit te PD-së në funksion të zgjidhjes se problematikes, qe ka shkaktuar një përçarje të thellë nga qendra në bazë dhe i bëjmë thirrje anëtarëve të pezulluar të ofrojnë të njëjtin mekanizëm për zotin Berisha i cili duhet të tërhiqet për të bërë të mundur bashkimin e demokratëve”, tha ai përpara mediave.
