Ilir Demaliaj ka ironizuar vizitën në Shtetet e Bashkuara të Amerikës të presidentit në ikje, Ilir Meta. Përmes një postimi në rrjetet sociale, Demaliaj theksoi ditën e djeshme se Metën në Amerikë nuk e priste qoftë edhe një oficer i Departamentit të Shtetit, por u prit me ceremoni të madhe vetëm nga anëtarët e “Vatrës”.
“Presidentin Meta në Amerikë nuk e priti qoftë dhe një oficer desk i State Departament. U prit me ceremoni madhështore nga njerëz me rëndësi te politikës dhe ekonomisë dhe ushtrisë Amerikane si Kryetari i Vatrës Elmi Berisha, Presidenti Nderit Agim Rexha, dhe plot anëtarë gjeopolitik strategjik të kësaj organizate tavlle e dominoje ku qeveria Amerikane nuk bën asnjë veprim pa konsultime dhe sugjerime me këta.
Nga këtu rrodhi dhe vizita në Baku të Azerbajxhanit Meta-Berisha”, shkruan Demaliaj. Më herët edhe ish-kryetari i Aleancës Kuq e Zi, Kreshnik Spahiu ka ironizuar në rrjetet sociale vizitën fundit të presidentit Ilir Meta në Shtetet e Bashkuara.
Duke vënë në pah se kreu i shtetit deri tani është takuar vetëm me përfaqësues të komunitetit shqiptar në SHBA, Spahiu ka nxjerrë edhe “agjendën” e vizitës së Metës. “Axhenda e Presidentit Ilir Meta në SHBA:
Takim me shoqatën e pensionisteve Vatra; Drekë peshku me tre emigrantë shqiptarë; Darkë në Picerinë Tetova New-York; Mëngjes: kafe me 7 student skraparlli në SHBA; Blerje kostumesh dhe kollaresh në China Town; Drekë dy këngëtare dasmash shqiptare New Jersy; Intervistë me Radion shqiptare; Foto tek kangjellat e Shtëpisë Bardhë nga trotuari;
Foto me policin e trafikut rrugor; Foto me stjuardesat e United Airline në kthim”, shkruan Spahiu. Kujtojmë se presidenti Ilir Meta mori pjesë në ceremoninë e 110 vjetorit të themelimit të Federatës Pan-Shqiptare “Vatra” në Neë York. Meta ka përshëndetur festimet, ndërsa deklaroi se secili shqiptar në Amerikës meriton mirënjohje të veçantë për kontributin e dhënë për çështjen shqiptare.
