Shtohen sinjalet se PS dhe presidenti Ilir Meta kanë nxjerr flamujt e bardhë të paqes. Pas një përplasjeje të fortë deri më dy mars, nga dita në ditë po jepen sinjale qetësie. Deri dje ishte presidenti ai i cili po jepte sinjale paqeje, pasi ka ndalur sulmet ndaj qeverisë dhe madje e falënderoi publikisht kryeministrin.
Edhe ky i fundit në një deklaratë për mediat e falënderoi presidentin mbi angazhimin për Covid-19. Por sot është dhënë sinjali i qartë se palët po e gjejnë rrugën e dialogut.
Sot u mblodh Konferenca e Kryetarëve, ku u miratua kalendari 3 javor i punimeve të Kuvendit. Ajo që bie në sy është se pjesë e punimeve do të jenë vetëm dy dekrete te presidentit: Ai për kthimin për rishqyrtim të ligjit kundër KÇK dhe dekreti i një dite më parë për kalimin e pronësisë. Por në Kuvend janë dhe dy dekrete të tjera, të cilat janë shtyrë.
Bëhet fjalë për dekretin mbi ndryshimet në ligjin për Gjykatën Kushtetuese dhe dekretin për ndryshimet në ligjin për statusin e gjyqtarëve dhe të prokurorëve. Më pak fjalë, janë ndryshimet që i heqin Metës betimin e gjyqtarëve dhe prokurorëve. Për këto ndryshime Meta doli në protestë në 2 mars dhe paralajmëroi mazhorancën se nëse i rrëzon dekretet do të mësyjë në Parlament.
Sipas burimeve, arsyeja se përse PS ka vendosur të shtyjë dekretet është dhe për shkak të Komisionit të Venecias. Venecia shtyu për në qershor raportin final dhe kërkoi nga mazhoranca që të mos nxitohet me ndryshimet ligjore. Pra PS ka vendosur që të mos ja rrudhë kompetencat presidentit. Mbetet të shihet se çfarë do të ndodhë në qershor, por sinjalet janë se mund të ketë një tërheqje nga këto ndryshime.
