Policia e Kosovës ka arrestuar kreun e Federatës së Futbollit të Kosovës, Agim Ademi, i cili po merret në pyetje prej katër orësh në stacionin policor në lagjen e Muhaxherëve në Prishtinë.
Mediat e Kosovës bëjnë me dije se ndaj Ademit është lëshuar një fletë-arrest. Në dy-tri vitet e fundit ka pasur raportime në media se Federata e Futbollit e Kosovës ka qenë duke u hetuar nga prokuroria, policia e krimeve ekonomike dhe inteligjenca doganore për keqpërdorimin e fondeve dhe shmangie tatimore.
Mësohet se në Polici ka edhe zyrtarë të tjerë të rëndësishëm në Federatë.
Ky arrestim vjen katër ditë para ndeshjes së Kombëtares së Kosovës ndaj Izraelit në kuadër të kualifikueseve për “Euro 2024”.
Gati një vit më parë Ademi ishte arrestuar nga Policia e Kosovës me dyshimin për sulm fizik ndaj një punëtori të FFK-së.
