Mungojnë rrugët dytësore dhe mbikalimet
Mungesa e rrugëve dytësore në aksin Rrogozhinë-Fier vijon të shkaktojë aksidente dhe viktima. Gjurmët e aksidentit që ndodhi mbrëmjen e së dielës në fshatin Pirrë të Lushnjes, ku mbetën të plagosur 6 persona, pasi një traktor dhe një makine u përplasën, duken ende.
Në rrugë qarkullojnë pa pushim kamionë, karroca e mjete bujqësore dukë e prerë rrugën në formë të rrezikshme për makinat e tjera.
“Kjo autostradë është ndërtuar afro 20 vjet më parë, megjithatë problemet vijojnë të njëjta edhe sot. Në të gjithë gjatësinë e saj ka hyrje dalje nga fshatrat, bizneset private apo banesat që përbëjnë një rrezik për aksidente”.
Herë pas here, Autoriteti Rrugor Shqiptar ka tentuar të mbyllë këto hyrje-dalje apo ato të karburanteve të shumta të ndërtuara anës autostradës, por pa sukses. Kjo pasi mungojnë tërësisht rrugët paralele që të lëvizin mjetet bujqësore dhe banorët që jetojnë në dy kahet e autostradës.
Mbikalime e nënkalime nuk ka po ashtu.
Ekspertët e sigurisë e kanë ngritur shpesh herë zërin për rrezikun që vjen nga mungesa e standardit në rrugë. Po sa kohë rrugë dytësore nuk ka, në autostradë do të qarkullojnë bashkë makinat, njerëzit, biçikletat, e jo rrallë herë karrocat e traktorët.
Alarmi për sigurinë rrugore mbetet po ashtu i ndezur për aksin Qafë Kashar-Durrës apo Thumanë-Milot, ku aksidentet janë lajmi më i zakontë i kronikës së zezë.
