Ministria e Jashtme e Greqisë ka reaguar pas dënimit të Fredi Belerit me dy vite burgim nga ana e Gjykatës së Posaçme.
Ministria e Jashtme greke thotë se vendimi i sotëm krijon shqetësim për objektivitetin e procesit gjyqësor ndaj Belerit.
“Dënimi i sotëm nga një gjykatë shqiptare ndaj kryebashkiakut të zgjedhur të Himarës, Fredi Beleri, shton shqetësimet për objektivitetin e procesit. Dhe kjo për shkak të zbehjes së prezumimit të pafajësisë për shkak të deklaratave të jashtme që mbrojnë dënimin dhe për shkak se dënimi përfundimtar është dukshëm joproporcional në raport me veprën penale të pretenduar.
Masa e dënimit që të mos dalë nga burgu, e pengon kryebashkiakun e zgjedhur që të mos marrë detyrën dhe në krye të bashkisë qëndron kandidati që humbi zgjedhjet, pavarësisht vendimit të gjykatës disa muaj më parë që vendosi shkarkimin e menjëhershëm të tij.
Zbatimi selektiv i vendimeve gjyqësore nuk është në përputhje me parimet e shtetit të së drejtës. Qeveria greke do ta monitorojë nga afër këtë çështje dhe pret një gjykim të drejtë dhe objektiv në apel”, thuhet në reagimin e Ministrisë së Jashtme të Greqisë.
Fredi Beleri u dënua sot nga GJKKO me dy vite burgim për korrupsion në zgjedhjet vendore të 14 Majit 2023.
Beleri i fitoi zgjedhjet për Bashkinë e Himarës, por nuk u betua për shkak se ndodhet në paraburgim. Kjo çështje ka shkaktuar edhe tensione diplomatike mes Shqipërisë dhe Greqisë.
