Kandidati i koalicionit “Bashkë fitojmë” për Bashkinë e Tiranës, Belind Këlliçi është prononcuar ditën e sotme në emisionin ‘Breaking’ në Top News mbi çështjen e shkollimit të tij.
Ai konfirmoi se në Shqipëri ka kryer vetëm 4 vite gjimnaz te Instituti “Harry Fultz”, ndërkohë që dega e tij në këtë shkollë profesionale ka qenë cikël 5-vjeçar.
“Shpifje nga mediat çështja e shkollimit tim. Kam fituar bursë dhe jam diplomuar me mesataren më të lartë. E gjitha kjo është një tymnajë për të hequr vëmendjen nga fushata dhe premtimet.
Nuk arrij ta kuptoj se çfarë ka këtu kaq të pakuptueshme. Nuk ka patur moj diplomë, s’ka patur. Ka patur vetëm dëftesë pjekurie.
Unë kam shkuar në SHBA, kam dhënë gjithë provimet dhe kam nisur shkollën. Ndërkohë edhe në Amerikë universiteti bëhet ne bazë kreditesh dhe e testeve që jepen. Kaq e thjesht është e gjithë historia.
Keni minimumin e detyrimit që kur publikoni një shkresë ta publikoni të plotë”- tha Belind Këlliçi në studio.
Shqiptarja.com ka publikuar dy shkrime mbi shkollimin e Këlliçit, ku nga dokumentet e publikuara rezulton se nuk ka pasur një diplomë të shkollës të mesme.
Sipas investigimit, Këlliçi ka mashtruar universitetin “Coppin University” në Maryland, SHBA, dhe më pas edhe shtetin shqiptar, duke u regjistruar në shkollën amerikane (dhe duke bërë njësimin më pas të diplomës) pa pasur një diplomë të shkollës së mesme.
Këlliçi ka deklaruar shpesh se vëllai i tij ka qenë dhe është mbështetësi i tij më i madh në jetë, e çuditërisht në vitin 2005, kur Këlliçi u regjistrua në universitet, ai punonte në zyrën e pranimeve të studentëve të universitetit amerikan.
Ka dyshime të forta se ka qenë pikërisht vëllai i tij, i cili nëpërmjet ndërhyrjes personale, e ka ndihmuar të regjistrohet lehtësisht në këtë universitet, pa e pasur diplomën e shkollës së mesme. Këlliçi ka rrëfyer se vëllai i tij është edhe financuesi kryesor i fushatës me sponsorizime prej mijëra eurosh në Facebook.
Duhet theksuar se vëllai i Këlliçit aktualisht është edhe anëtar Bordi i Institutit “Harry Fultz”.
