Historiani Pëllumb Xhufi i ftuar në emisionin ‘Shqip’ mbrëmjen e djeshme foli për rezolutën e propozuar nga Sali Berisha në Parlament lidhur me masakrën e Serbrenicës, për të cilën tha se ishte shumë e vonuar dhe kishte si qëllim protagonizmin politik të Berishës.
Ai tha se kur amerikanët kërkonin firmosjen e rezolutës kur ndodhi masakra, ishte Sali Berisha ai që kërkonte të kundërtën.
“Ishte një përpjekje për të thyer injorimin që po i bëhet organizimeve që po përpiqet që të bëjë Sali Berisha për të dalë përsëri në skenën politike.
Masakra në Serbrenicë ka ndodhur 30 vjet më parë dhe Berisha që ka qenë ndërkohë dhe kryeministër dhe president e kreu i opozitës për shumë vite të tjera kishte pasur rastin ta tregonte këtë dobësinë e tij ndaj popullit martir të Bosnjës.
Por kjo periudhë tragjike është shoqëruar me heshtjen nga qeveria e tij sepse në fund të fundit pas Bosnjës erdhi Kosova.
Edhe në rastin e Kosovës Berisha ka qenë në rolin e kondra-pedalit. Amerikanët na thoshin për rezolutën që duhet urgjentisht të firmoset sepse nuk mund të presim. Në të njëjtën kohë shikoje Berishën që kërcënonte delegacionin shqiptar që të mos e firmoste se ishte tradhti kombëtare”, u shpreh Xhufi.
