Kryetari i Partisë Demokratike, Lulzim Basha ka rrëzuar dje ish-kryeministrin Sali Berisha për çështjen e bojkotit të Parlamentit. Pak ditë më parë ish-kryeministri Berisha, deklaroi gjatë një interviste televizive se opozita duhet t’i shkëpusë marrëdhëniet me Parlamentin njëherë e përgjithmonë. Por kjo deklaratë e ish-kryeministrit Sali Berisha, duket se nuk ka marrë sërisht mbështetje nga kreu demokrat Lulzim Basha, i cili e ka rrëzuar sërish idenë e bojkotit parlamentar.
Në një deklaratë të dhënë para mediave, pas përfundimit të mbledhjes së grupit, Basha teksa u pyet nga gazetarët nëse PD do të shkojë drejt bojkotit parlamentar, e evitoi pyetjen duke lënë të nënkuptohet se demokratët nuk do të bojkotojnë seancat parlamentare.
Detaj që ka treguar se Basha ka rrëzuar përfundimisht skenarët e Berishës për kaos dhe dhunë. “Ç’lidhje ka kjo me Toyota Yaris dhe me drogën e Taulant Ballës?”, u shpreh Basha. Sakaq, Basha teksa hodhi poshtë idenë e Berishës për të bojkotuar Parlamentin, akuzoi kryeministrin Rama se ka kthyer vendin në një ekonomi të drogës dhe se nuk ka plotësuar kushtet e vendosura nga BE. “Kjo është gjëma që ka ndërtuar Edi Rama në Shqipëri.
Kjo është arsyeja pse këtë javë Bashkimi Europian, përkundër dëshirës së 97% të shqiptarëve, përkundër punës që ne kemi bërë si opozitë, prapë se prapë vendos që Shqipëria s’i ka plotësuar kushtet. Sepse kushti themelor është të ndërtojë një shtet të së drejtës dhe jo një shtet të drogës, jo një narkoshtet.
Kushti themelor është të ndërtojë një ekonomi me shanse për të gjithë dhe jo një ekonomi të pastrimit të parave të pista të drogës, ku pesë banda kriminale dhe pesë oligarkë kontrollojnë të gjithë ekonominë. Biznesi i vogël dhe i mesëm është në kolaps, profesionistët janë në arrati, mediat janë të kapura, rinia është e pashpresë. Ky është treguesi”, u shpreh Basha. /Endri Arizi
