Pa koment
Prej dy ditësh, ka nisur protesta e banorëve, të cilët kanë banesat dhe bizneset përgjatë aksit rrugor nga “Shkolla teknologjike”, deri te “Shehi Shqiponja”, të planifikuara për t’u shkatërruar, për shkak të projektit zhvillues të kësaj rruge.
Ndërkohë që banorët kanë protestuar “kolektivisht”, bashkëshortja e ish-diktatorit Enver Hoxha dhe familja e Shefqet Peçit, ish-drejtuesit të lartë shtetëror në 46 vitet e sundimit të atij regjimi, kanë dalë publikisht vetë, duke e quajtur “pushtet fashist e bandit”, qeverinë e PS.
Menjëherë pas reagimit të Nexhmije Hoxhës, me të njëjtin ton e gjuhë si të saj, ka reaguar edhe (ar)miku i tërbuar i diktatorit Hoxha, ish-kryeministri Sali Berisha, i cili ka shprehur nderim për protestuesit.
Ja reagimi i Nexhmije Hoxhës: – “Banorët që po protestojnë, kanë plotësisht të drejtë dhe duhen mbështetur nga të gjithë, mbasi me duket një veprim tipik fashist që po realizohet pa njoftim, si banditët…”
Ja reagimi i Sali Berishës: – “Nderim dhe mbështetje të plotë, qytetareve që protestojnë në mbrojtje të shtëpive dhe bizneseve të tyre kunder qeverisë bandite. Sb”./Pamfleti
