Kryetari i PD-së, Sali Berisha do të paraqitet sot, në orën 10:00, në SPAK për t’u pyetur lidhur me kallëzimin e bërë për shpifje nga gjyqtarja Irena Gjoka. Ai do të pyetet si person në dijeni lidhur me një deklaratë të vajzës së tij, Argita Berisha se gjyqtarja ka marrë rrushfet prej 500 mijë eurosh nga një eksponent i PS-së.
Berisha do të shkojë në orën 10:00 të mëngjesit dhe ka konfirmuar prezencën e tij. Në shkresën që mban firmën e prokurorit Elvin Gokaj, thuhet se refuzimi apo mosparaqitja e përball me penalitete të tjera sipas Kodit Penal, deri në shoqërim të detyrueshëm.
Çështja lidhet me akuzat që ka bërë vetë Berisha herë pas here ndaj magjistrates, por edhe me ato të vajzës së tij, Argita Berisha vitin e kaluar, se ajo “kishte marrë 500 mijë euro nga një eksponent i PS-së”.
Berisha organizoi një “fushatë” sulmesh ndaj gjyqtares menjëherë pasi u shortua për dosjen e aferës “Partizani” dha masat “arrest shtëpie” për Berishën dhe “arrest me burg” për dhëndrin e tij, Jamarbër Malltezi.
Ish-kryetarja e GJKKO, Irena Gjoka ka kërkuar në tetorin e kaluar (2024) nga SPAK, që të hetojnë deklaratat e Argita Berishës, e cila do të deklaronte në një konferencë për shtyp më 23 shtator 2024, se të paktën 17 prokurorë dhe gjykatës të strukturës së posaçme janë në dosjen e “Encrochat” dhe se në një video gjyqtarja Irena Gjoka del duke i kërkuar një ish-eksponenti socialist 500 mijë euro ryshfet që të mos e fuste në grup të strukturuar kriminal.
Po për këtë çështje Argita Malltezi u thërrit më 9 janar në SPAK, për tú pyetur lidhur me akuzat ndaj gjyqtares Gjoka.
Gjoka është gjyqtarja e hetimit paraprak që caktoi masat e sigurisë për Berishën, i cili ndodhet në masën detyrim paraqitje, dhe dhëndrin e tij me masë arrest në shtëpi.
