Pas ngjarjeve tronditëse të një dite më parë ku mbështetësit e Trump mbajtën të rrethuar për disa orë Kongresin amerikan ndërsa mbahej seanca e certifikimit të zgjedhjeve presidenciale, shumë politikanë dhe personazhe të njohura lëshuan thirrjen për aplikuar amendamentin e 25.
Donald Trumpit i kanë mbetur më pak se dy javë në krye të Shtëpisë së Bardhë, por demokratët e Komisionit të Ligjeve në Dhomën e Përfaqësuesve kërkojnë që atij t’i hiqen atributet si president për shkak të akteve të dhunës që shkaktuan në fund 4 viktima.
Ata i shkruan një letër zv.presidentit Mike Pence ku i bëjnë thirrje që të largojë Trump nga zyra, me motivacionin se kishte nxitur një akt kryengritje dhe minuar demokracinë.
Diskutimet janë fokusuar në amendamentin e 25 të Kushtetutës, i cili lejon transferimin e pushtetit nga presidenti te zv.presidenti përkohësisht apo në mënyrë permanente.
Ky amendament gjithashtu siguron procedurat për largimin e një presidenti nga detyra prej zv.presidentit dhe anëtarëve të kabinetit, nëse ai konstatohet i paaftë për të kryer kompetencat dhe detyrat.
Frika është se deri më 20 janar Trump mund të bëjë ndonjë marrëzi tjetër, ndaj duan që ta largojnë sa më shpejt nga Shtëpia e Bardhë.
