Është njohur tradicionalisht si një ndër mbështetësit më të mëdhenj të Lulzm Bashës, por deputeti i ri Arlind Çaçani i surprizoi të gjithë duke pranuar mandatin e deputetit.
Në një intervistë për “Tema” ai ka treguar se pavarësisht këtij vendimi ai vazhdon të jetë një ndër demokratët më të flaktë.
“Nuk e kam braktisur Partinë Demokratike. Vazhdoj ende të jem demokrat i flaktë, njësoj si ditën e parë që kam aderuar në Partinë Demokratike. Unë mbaja pozicionin e Kryetarit të Forumit Rinor, edhe e kam kryer këtë detyrë fisnike me dinjitet. Por vendimi tim personal u ndikua edhe nga disa demokrat të Kolonjës që më kanë mbështetur edhe inkurajuar që të jem pjesë e Parlamentit. Normal që ka edhe kundra.
Unë mendoj se ligjet edhe reformat bëhen në Kuvend. Në qoftë se do duam t’i japim Shqipërisë një reformë të re zgjedhore. Në qoftë se do ti japim Shqipërisë një sistem të ri zgjedhor. Në qoftë se do ti jap një klasë të re politike e vetmja mundësi edhe në Parlament.”, shprehet Çaçani.
Deputeti i ri ka folur edhe për vështirësinë me të cilën e mori vendimin për t’u rikthyer në Kuvend.
“Të vështirë e pata, sepse e dija që do bëhej gjyqi popullor edhe do etiketohesha si tradhtar, komunist, i shitur te qeveria. Sepse komunist ju dukem unë, që na kanë vrarë e na ka burgosur si fis gjatë regjimit komunist. E nuk ju duken ish- sigurimsat që kanë zaptuar Partinë Demokratike, ata që i dhanë votat Gramoz Ruçit për Kryetar Kuvendi.”
Ndërsa i pyetur se çfarë ka marrë në këmbim për të pranuar mandatin, Çaçani shprehet: “Të siguroj që po të ishin ofruar lekë nuk do vinte radha deri tek unë për të marrë mandatin. Kurrë nuk jam bërë pjesë e ndonjë pazari dhe as mendoj se do të bëhem.”
