Një ngjarje e rëndë tronditi qytetin e Shkodrës ditën e sotme, ku si pasojë e flakëve humbi jetën një i moshuar 79-vjeçar, i sëmurë dhe i paralizuar, ndërsa ka përfunduar në spital bashkëshortja e tij.
Në banesë jetonin vetëm çifti i të moshuarve, të cilët ngroheshin me gaz, ndërsa dyshohet se zjarri ka rënë nga rrjedhja e bombolës së gazit.
Pas flakëve menjëherë kanë ndërhyrë banorët e lagjes dhe një turist gjerman, i cili po kalonte rastësisht. Ata kanë arritur të nxjerrin prej aty bashkëshorten e viktimës, ndërsa ka qenë e pamundur nxjerrja e të moshuarit, shtetasit M. Z.
Banori i cili ndihmoi gruan e moshuar tregon detajet, ndërsa thotë se çifti i të moshuarve jetonin të vetëm dhe nuk kishin asnjë njeri, i cili mund të kujdesej për ta.
“Janë burrë e gru pa fëmijë pa asnjë tjetër në botë. Nuk është hera e parë që digjen është hera e tretë që digjen. As ka vu dorë shteti as bashkia.
Të gjithë lagjja e dinë shumë mirë për këtë të shkretin, të dy janë sakatë. Atë gruan hyra unë e shpëtova, nuk munda dot me duru, plasi gazi dhe dola jashtë.
Gruan e nxorra jashtë e kanë marrë me ambulancë dhe e çuan në spital. Jetojnë të vetmuar, kanë ardhur 20 herë ambulanca dhe zjarrfikësja, i kanë çuar i kanë vizituar dhe i kanë sjell këtu. Njëri ka qenë sakat ja ku e ke karrocën, i kemi ndihmuar sa kemi pas mundësi.
Kjo vdekja e tyre është me dashje, është me qëllim sepse nuk kanë dasht me vu dorë! Kanë qenë me qira këtu, ishin të sëmurë pa këmbë edhe pa durë. Si ka dhënë zoti fëmijë, sot i kanë lënë këtu për të vdekur.
Dy vjet kanë që janë këtu dhe nuk kanë asnjë njeri këtu”, u shpreh Isa Ulqinku, banori që mundi të shpëtojë jetën e zonjës, e cila ka pësuar djegie dhe ndodhet jashtë rrezikut për jetën në Spitalin Rajonal Shkodër.
Përgjegjësi i OSHEE ka folur para gazetarëve duke hedhur poshtë të gjitha mundësitë për një shkëndije elektrike
“Në moment që na kanë lajmëruar, elektriku ka ardhur dhe janë stakuar automatët dhe nuk ka asnjë defekt prej elektrikut. Ka ardhur si pasojë e rrjedhjes së gazit, siç thotë edhe zjarrfikësja.
Prej elektrikut nuk ka asnjë lloj problemi. Ka automat mbrojtëse që fiket në moment, i ka fik elektricisti në momentin që janë lajmëruar”, tha ai.
Ndërkaq, një turist gjerman që po kalonte pranë shtëpisë që ishte përfshirë nga flakët ka folur para kamerave duke thënë se:
“Pashë tymin teksa dilte nga shtëpia, pashë edhe ambulancën dhe policinë që po vinin. Një zonjë e vjetër u nxorr jashtë dhe u mor nga bluzat e bardha dhe vetëm kaq pash.
Isha shumë vonë dhe nuk mund të bëja asgjë. Nuk isha këtu kur shpërtheu dhe nuk di të them asgjë më tepër”.
