Gjykata e Apelit të Tiranës vendosi dje të rihapë dosjen e vrasjes së ish-deputetit demokrat, Azem Hajdari. Ish-truproja e Sali Berishës, Izet Haxhia e riktheu edhe një herë në vëmendje këtë çështje kur u ekstradua në maj të vitit të kaluar nga Turqia në Shqipëri. I dënuar me 25 vite në mungesë si bashkëpunëtor në vrasjen e Hajdarit, Haxhia kërkoi nga drejtësia shqiptare rigjykim.
Një të drejtë të tilla ia dha dje trupa gjykuese e caktuar nga Këshilli i Lartë Gjyqësor, e përbërë nga Dhimitër Lara, Sokol Binaj dhe Nure Dreni. Treshja gjykuese, pasi dëgjoi për herë të fundit pretendimet e Izet Haxhisë dhe qëndrimin e prokurores së çështjes, Fatjona Memçaj, vendosi ta rikthejë çështjen tek Gjykata e Shkallës së Parë të Tiranës. Në këtë gjykatë pritet që të nisë edhe një herë nga e para procesi gjyqësor për Izet Haxhinë, i akuzuar për vrasjen e Azem Hajdarit.
Ky rigjykim do të sjellë edhe përballjen e parë të Izet Haxhisë me Sali Berishën. Ish-kryeministri është akuzuesi më i madh i Haxhisë. Por Izet Haxhia kërkon ballafaqim me Berishën në sallën e gjykatës, ku pretendon të japë fakte dhe argumente që provojnë se ish-kryeministri është fajtor për vrasjen e Hajdarit.
Për këtë arsye, i pari që do të thirret në bankën e dëshmitarëve për të dhënë sqarime për atentatin ndaj ish-deputetit demokrat do të jetë Berisha. Diçka të tillë e pohoi dje edhe vetë avokati mbrojtës i Haxhisë, Bashkim Nikolla në një prononcim mediatik. “Ky vendim e rikthen çështjen në Gjykatën e Shkallës së Parë. Kemi siguruar të drejtën të dëgjohemi. Ne do të provojmë pafajësinë që i është faturuar të përfaqësuarit prej meje. Në krye të listës së dëshmitarëve që do të thirren është Sali Berisha”, tha Nikolla.
42 dëshmitarët dhe provat e reja
Përveç Sali Berishës, Izet Haxhia ka përgatitur një listë edhe me 42 emra të tjerë që do t’i thërrasë për të dëshmuar për të provuar pafajësinë e tij. Pjesë e listës janë edhe një sërë emrash të njohur si ish-kryeministri Fatos Nano, gazetarët Ylli Rakipi dhe Alfred Peza, zëvendësministri i Mbrojtjes, Petro Koçi, demokratët Genc Pollo, Jemin Gjana dhe Jozefina Topalli, por edhe ish-kryetari i Shërbimit Informativ Shtetëror, Fatos Klosi, por edhe Sali Lusha, Fisnik Sina, Zenel Neza, Mentor Daja, Sami Sula, Erli Murati, Genci Pepo, Kujtim Yzo, Pëllumbesh Gjoni, Marjan Gryka, Guxim Biberaj, Agim Logu, Jaho Mulosmani, Ismet Haxhia, Isamedin Haxhia, Genci Burimi, Majlinda Popoviç, Dhurata Sina, Arben Rakipi, Agim Selimi, Shkëlzen Lushaj, Lad Mustafa, Ilir Cano, Elvis Gjeci, Afrim Krasniqi, Dem Dollapi, Cek Prozhlloni, Nehat Kulla, Astrit Muldaka, Spartak Poçi, Vili Minarolli, Shkëlzen Susha, Lad Mustafa dhe Besim Ymaj.
Të gjithë këta emra janë personazhe që kanë dijeni për ngjarjen dhe mund të japin informacione shumë të volitshme për zbardhjen e plotë të asaj. Madje Fatos Klosi është një ndër ata që e ka akuzuar drejtpërdrejt Sali Berishën se ka gisht në atentatin ndaj Azem Hajdarit.
Jo vetëm dëshmitarët, por edhe një sërë provash të reja pritet t’u japin një rrjedhë tjetër hetimeve për vrasjen e Hajdarit. Haxhia deklaroi edhe dje se në dorë ka materiale që provojnë pafajësinë e tij, ku përmendim bllokun e shënimeve sekrete të Perikli Tetës; bllokun e shënimeve të Drejtorit të Përgjithshëm të Policisë, Albert Dervishi; tabulatet e celularëve; kronikën e regjistruar e gazetarit Artan Hoxha; regjistrimin e bisedës me diktofon të Ylli Rakipit me të plagosurin rëndë, Zenel Neza në prani të Berishës tek Spitali Ushtarak.
Me gjithë këto dëshmi dhe prova të reja, nëse gjatë rigjykimit të Izet Haxhisë dalin në pah detaje të pathëna më parë, mundet që gjykata të vendosë riçeljen e plotë të hetimit, duke hetuar dhe nxjerrë kështu para drejtësisë fajtorët e vërtetë. Sipas Haxhisë, ky fajtor është Sali Berisha ndaj mund të themi se ai është në panik dhe i rrezikuar. /Mimoza Ibra
