Drejtoresha e Shërbimit Informativ të Shtetit, Vlora Hyseni, zhvilloi një vizitë zyrtare në Uashington DC në datat 15-17 maj 2025.
Gjatë qëndrimit në SHBA, ajo u takua me përfaqësues të lartë të institucioneve amerikane të sigurisë dhe inteligjencës, përfshirë Zyrën e Inteligjencës Kombëtare (ODNI),
Departamentin e Shtetit dhe Agjencinë Qendrore të Inteligjencës (CIA). Bisedimet u përqendruan në zgjerimin e bashkëpunimit ndërinstitucional dhe forcimin e partneritetit strategjik mes Shqipërisë dhe Shteteve të Bashkuara.
Sipas një komunikate për shtyp të SHISH, një nga takimet më të rëndësishme ishte ai me Drejtoreshën e Inteligjencës Kombëtare të SHBA-së, Tulsi Gabbard, ku u trajtuan çështje që lidhen me sfidat dhe mundësitë e bashkëpunimit në fushën e sigurisë dhe inteligjencës, duke vënë në pah rëndësinë e bashkëpunimit për sigurinë kombëtare të të dy vendeve.
Gjatë këtyre takimeve, u shkëmbyen mendime për zhvillimet më të fundit në sigurinë rajonale dhe ndërkombëtare. SHISH thekson se u vlerësua kontributi i Shqipërisë në garantimin e sigurisë dhe stabilitetit në Ballkan, ndërsa vetë agjencia shqiptare u konsiderua një partner i qëndrueshëm dhe i besueshëm.
Në diskutimin me Drejtorin e CIA-s, John Ratcliffe, u theksua bashkëpunimi i frytshëm mes dy strukturave dhe rëndësia e përbashkët për identifikimin dhe ndalimin e kërcënimeve që cenojnë sigurinë. U ra dakord për të avancuar më tej në fushën e inteligjencës dhe për të forcuar kapacitetet e SHISH në këtë drejtim.
Vizita u konsiderua si një tregues i angazhimit të ndërsjellë për të forcuar vendimmarrjen strategjike përmes shkëmbimit të informacionit cilësor dhe të saktë, duke kontribuar kështu në sigurinë rajonale dhe atë globale.
