Një operacion i zgjeruar anti-drogë në Leçe, ka sjellë arrestimin e 37 personave, mes tyre edhe disa anëtarë të organizatës mafioze “Sacra Corona Unita”.
Të ndaluarit, akuzohen për krijim të organizatave kriminale, trafik të lëndëve narkotike, armëmbajtje pa leje dhe material eksploziv, zhvatje, rrëmbim personash dhe dhunë. Në pranga ka përfunduar edhe ish-futbollisti i Leçes, Davide Petrachi.
Hetimet kishin nisur në vitin 2015 nga policia italiane dhe në goditjen e tre organizatave mafioze, dyshohet se janë edhe elementë ë mund të bëjnë pjesë në klanin famëkeq italian, “Santa Corona Unita”. Gjatë operacionit, janë sekuestruar sasi lëndësh narkotike si marijuanë, heroinë, kokainë, katër detonarorë, 2 lëndë shpërthyese artizanale, 1 Ak-47 Kallashnikov, 5 pistoleta dhe municione të ndryshme.
Dy prej tre grupeve kriminale të shkatërruar në këtëo operacion, merreshin kryesisht me trafikimin e drogës. Droga trafikohej nga Kolumbia në Itali por dhe nga Shqipëria, Maroku e Spanja. Sipas hetimeve biznesi i drogës i siguronte këtyre grupeve kriminale një përfitimi prej miliona euro e vetëm brenda një muaji, në shtator të 2015, kishin mundur të hidhin në treg drogë në vlerë 300 mijë euro. Ndër 37 urdhër arrestimet nuk ka asnjë shtetas shqiptar, ndonëse hetimet janë akoma në zhvillim.
Ndërkohë, për ish-portierin leçez Davide Petrachi, gjykata ka vendosur masën e sigurisë “arrest shtëpie”. Ai ka qenë një nga portierët e organikës puljeze për 7 sezone, duke luajtur edhe në Serinë A deri në 2014-2015, për të vijuar më pas me Virtus Lancianon, Martia Franca dhe Nardo Calcio në Serinë D. Petrachi thërritej nga të dyshuarit “futbolli” ose “portieri”./gazeta-Shqip.com
