Ndërhyrje në punët e drejtësisë e cilëson kreu i KED-së njëherësh i Gjykatës së Lartë Ardian Dvorani kërkesën e presidentit Meta drejtuar KLGJ për mandatin e tij. ReportTv ka mësuar se pak para mbylljes së orarit zyrtar këtë të hënë Dvorani ka dhënë argumentet e tij duke thënë se do të qëndrojë në detyrë deri në ardhjen e zëvendësuesit të tij.
“Presidenti nuk ka tagër që të merret me punët e drejtësisë dhe mandatin tim. KLGJ emëron gjyqtar dhe jo të zëvendësojë mandate. Do të qëndroj në detyrë derisa të vijë pasardhësi” thuhet ndër të tjera në përgjigjen e Dvoranit.
Sipas Dvoranit as Sokol Sadushi, as Ervin Pule dhe Ilir Panda nuk janë pasuesit e tij ç’ka do të sillte lirimin e postit pasi mandati i ka përfunduar. E më tej shton ai si takon KLGj-së të merret me mandatin e tij pasi s’ka tagër.
Më herët ishte presidenti Ilir Meta që i kërkoi KLGJ të shprehet për mandatin e përfunduar të Dvoranit si gjyqtar, i cili njëherazi është edhe kreu KED.
Për këtë cështje komisioni i karrierës në KLGJ përgatiti relacionin i cili do të votohet në mbledhjen e mesditës së të martës më 5 Maj 2020, ku thuhet se mandati i Dvoranit ka mbaruar por nuk është zgjedhur pasuesi.
Po ashtu në këtë relacion thuhet se potencialisht mund të zëvendësohet Dvorani, por kjo vendimmarrje i takon KLGJ. Mbledhja e nesërme pritet të mbahet në kushtet e pandemisë pa praninë e medias, ndërsa kjo është një ndër cështjet më me interes që do të shqyrtojë KLGj që nga krijimi i saj.
