Albert Veliu, personazhi që ndezi politikën shqiptare, prej tre ditësh ndodhet i arrestuar në Kosovë. Ai ka kërkuar azil në këtë vend, pasi pretendon se në Shqipëri rrezikon që ta vrasin.
Ajo që të bën përshtypje, është fakti se Partia Demokratike, nuk ka bërë asnjë deklaratë për ndalimin e dëshmitarit të saj, i cili deklaron se duan ta vrasin.
PD do të duhej të reagonte me forcë, pasi kjo është një deklaratë e rëndë dhe mban përgjegjësi për jetën e tij, duke qenë se është pikërisht PD-ja ajo që e futi në “valle”.
Por çuditërisht PD është distancuar nga ai dhe prej ditësh nuk e përmend më, edhe pse çdo ditë kërkon dorëheqjen e Ministrit të Brendshëm, Fatmir Xhafaj, bazuar në video-përgjimin në të cilin shfaqet “Babalja” dhe një person tjetër, i cili pretendohet se është Agron Xhafaj.
Asnjë prej deputetëve të PD-së dhe as Lulzim Basha, që prej denoncimit se Babales i kishin ofruar 200 mijë euro të ndryshonte dëshminë e tij, nuk e ka përmendur me Albert Veliun.
Madje nuk u përmend as në protestën e së shtunës, e cila u mblodh pikërisht prej Babales. Lind pyetja, përse PD ndërsa kërkon shkarkimin e Xhafajt, nuk e përmend më Babalen?
E përdorën dhe tani nuk u duhet më, apo është e kundërta, Babalja i futi në një qorrsokak, nga i cili nuk po dalin dot? Fakt është se dëshmia e tij ka qenë kontradiktore dhe e pabesueshme, dhe nuk ngjiti në publik.
Kjo gjë u pë më së miri dhe në protestën e thirrur të shtunën dhe me sa duket PD e ka kuptuar faktin se kauza e tyre bëhet qesharake me personazhë si Babalja, dhe tani ka vendosur ta mbajë larg.
