Ndërsa Shqipëria po përballet me emigrim të pandalshëm vitet e fundit studimet evidentojnë kostot në ekonomi të këtyre largimeve. E ato nuk janë vetëm tek tkurrja e lindjeve, pakësimi i popullsisë apo mungesat në tregun e punës, që janë edhe efektet më të dukshme.
Dëmi përllogaritet edhe tek investimi që bëhet tek një person derisa ai arrin moshën për emigrim, e këtu futen kostot e arsimit, shëndetësisë etj., që shoqëria paguan për të.
Sipas një studimi të fundit, arsimi i një qytetari shqiptar, në varësi të nivelit arsimor që ai ka kryer kushton rreth 6.000 euro për shkollën fillore; 9.300 euro për shkollën e mesme; rreth 18.300 euro për studimet akademike dhe rreth 32 mijë euro për studimet doktorale.
Por sa i kushton ekonomisë çdo qytetar që largohet nga vendi për në emigrim?
Sipas studimeve, ky dëm përllogaritet në 14.900 euro për person dhe humbja totale është e konsiderueshme nëse kemi parasysh numrin e lartë të emigrantëve dhe emigracionin që vazhdon me ritme të forta dhe të pandalshme vitet e fundit.
Nga ana tjetër, përfitimi i emigracionit janë dërgesat e emigrantëve, që ndryshe njihen si remitancat.
Këto flukse valutore shënuan nivelin rekord të 929 milionë eurove vitin e kaluar, ndërkohë që në fund të pjesës së parë të këtij viti arritën në 510 milionë euro, duke sinjalizuar se do të jenë në rritje të mëtejshme.
Por pavarësisht peshës së tyre të konsiderueshme, kontributi i tyre në ekonomi nuk është i madh.
Kjo pasi remitancat përdoren kryesisht për konsum personal dhe më pak për investime, duke mos dhënë ndonjë ndikim të madh në zhvillim. (Aurora Sulçe)
