Më shumë se 130 eurodeputetë firmosën një peticion i cili kërkon një taksë për pasurinë e ‘super të pasurve’ në shkallë ndërkombëtare për t’u bërë pjesë e tranzicionit ekologjik dhe social. Propozimi i publikuar në të përditshmen franceze ‘Le Monde’ u bë fillimisht nga eurodeputetja franceze Aurore Lalucq – socialistë e demokratë, e së majtës – dhe ekonomisti Gabriel Zucman – specialist i evazionit fiskal dhe tranzicionit të të ardhurave shumë të larta, që janë dhe promovues të kësaj fushate. Sipas tyre ajo që është arritur me kompanitë shumëkombëshe duhet aplikuar dhe tek super të pasurit.
Marrëveshja e referimit për një taksë globale minimale prej 15% për sipërmarrjet shumëkombëshe duhet të hyjë në fuqi këtë vit. Eurodeputetët shpjegojnë se propozimi i tyre është shumë i thjeshtë: futja në fuqi e një takse progresive mbi pasurinë e super të pasurve në shkallë ndërkombëtare për të reduktuar pabarazinë dhe për të kontribuar në financimin e investimeve të domosdoshme për tranzicionin ekologjik dhe social.
Autorët e këtij peticioni përmendin dhe idenë e vendosjes së taksës 1.5% në pasuri prej të paktën 50 milionë euro, por pohojnë se niveli i saktë i taksës duhet vendosur në mënyrë kolektive dhe demokratike. Lalucq e Zucman i bëjnë apel OSBE dhe Kombeve të Bashkuara që të nisin negociatat për taksat si dhe i kërkojnë Bashkimit Europian që të reagojë.
Në këtë peticion thuhet se në vitin 2018 Elon Musk, në atë kohë njeriu i dytë më i pasur në noyë, nuk ka paguar asnjë cent në taksa federale; si dhe që në Francë 370 familjet më të pasura aktualisht taksohen deri në 3%. Peticioni u firmos sidomos nga eurodeputetë të së majtës dhe të gjelbër, nga dhjetëra ekonomistë si dhe nga organizata ndërkombëtare jo fitimprurëse mes të cilave Oxfam.
