Përmes një deklarate, Kryetari i Grupit Parlamentar të PS-së, Taulant Balla, u mundua të justifikonte xhestin e rëndë të kryebashkiakut të Elbasanit GLedjan Llatja, mbi të cilin rëndon një akuzë mjaft e rëndë, se ka falur tokë për ndërtimin e kullave në këtë qytet.
Sipas Ballës, Llatja nuk ka faj pse e ka zbatuar projektin për tjetërsim të pronës publike, pasi ish-kryeministri Sali Berisha ka firmosur studimin dhe projektin në Bashkinë e Elbasanit, për të cilin vetë PD sot ka denoncuar kryebashkiakun në SPAK.
“Keqardhje që punët më të rëndësishme kthehen në debate politike. Është fake news, ju ftoj që ta verifikoni në Këshillin Bashkiak të Elbasanit.
Është si pasojë e debateve që kanë ata vetë brenda Partisë Demokratike. Sali Berisha ka firmosur edhe studimin edhe projektin e zonës.
Aso kohe ishte Lulzim Basha drejtues i listës së PD-së së Elbasanit. Falë një bashkëjetese që e ka karakterizuar Elbasanin vendimi ka qenë unanim.
Qytetarët e Elbasanit e dinë fare mirë që sipërfaqja e gjelbër do të shtohet. Prokuroria të hetojë. Projektin për të cilin e akuzojnë Llatjen e kanë votuar anëtarët e PD ne këshillin bashkiak të Elbasanit”, ka thënë Balla.
Por fakti që projekti qenka i firmosur nga PD dhe në shkelje të ligjit, nuk e pengon aspak Kryebashkiakun Gledjan Llatja të mos shkel ligjin duke anulluar projektin dhe jo duke e zbatuar atë.
A ndodhet njeri në bashkinë e drejtuar nga z. Llatja që studion këto projekte që janë në kundërshtim të rëndë me ligjin?!
Si mundet një kryebashkiak të zbatoj një projekt të tillë? Sigurisht, vetëm nëse pas projektit fshihen interesa të mëdha duke nisur nga Taulant Balla që e mbron pa justifikim, kryebashkiaku vetë, grupet e interesit, e deri tek PD që paska firmosur projektin dikur në kundërshtim me ligjin.
Nëse Llatja ka falur toka, ai duhet të përgjigjet para ligjit njësoj si të gjithë, bashkë me ata të PD-së që kanë firmosur projektin.
Firmosja e projektit nga PD nuk duhet të jetë justifikim për abuzuesit e ligjit. Asgjë nuk e lehtëson pozicionin e tij, as gjithëpërfshirja e partive më të mëdha në vend për të tjetërsuar, shitur, apo falur pronën publike.
Nëse Llatja ka shkelur ligjin, le të përgjigjet për pjesën e tij, dikush tjetër le të mendoj dhe për pjesën e PD.
Abuzuesit e ligjit, qytetarët i duan të gjithë në burg. Koha e fajit kolektiv ka vdekur me drejtësinë e vjetër, atë që z. Balla premton se kemi lënë pas.
Nëse kjo e reja ekziston, qoftë sadopak, abuzuesit e ligjit duhet të shkojnë në burg. Qofshin të PS-PD-LSI, të kujtdo partie tjetër apo kandidati të pavarur./Ekskluzive.al
