Zgjedhjet vendore janë vitin që vjen, por në shtator të gjitha partitë do të nisin përgatitjet, pasi në vendin tonë dihet që ligji nuk zbatohet dhe fushatat nisin 3-4 muaj para. Përgjithësisht zgjedhjet vendore kanë kaluar në plan të dytë, por këtë herë ato shihen vendimtare për të gjitha partitë politike.
PS synon t’i fitojë ato për të treguar se është ajo mazhoranca, ndërsa Basha e Kryemadhi e kanë çështje mbijetese. Lulzim Basha deri më tani ka humbur dy palë zgjedhje, ato të vitit 2015 dhe ato të vitit 2017. Në të dyja rastet ka pasur akuza të forta ndaj tij dhe madje u kërkua shkarkimi. Përmes lëvizjeve strategjike kreu demokrat i rezistoi largimit.
Por nëse dhe në zgjedhjet e 2019 ai del i humbur, atëherë pozitat e tij do rëndohen së tepërmi. Gazeta ka mësuar se synimi i Bashës është që të dalë më mirë se në zgjedhjet e 2015, për të treguar se PD është në ngritje dhe ai mund të arrijë rezultat të kënaqshëm në zgjedhjet e 2021. Për këtë arsye Basha dhe PD nuk janë të bindur nëse LSI do u sjellë fitore atyre, apo Kryemadhi do e shfrytëzojë bashkëpunimin për të mbajtur në këmbë LSI.
Nga ana tjetër, kjo e fundit i ka vendimtare zgjedhjet vendore. LSI po mbahet në këmbë momentalisht nga bashkitë që drejton, pasi vetëm aty ka ende militantë pranë saj, pasi të gjithë ata që u punësuan në drejtoritë që varen nga qeveria kanë kaluar me PS.
Socialistët synojnë që ta shfarosin LSI në zgjedhjet vendore dhe Kryemadhi po teton të bashkëpunojë me PD, pasi nëse PD-LSI-PS hyjnë me kandidat të ndarë, atëherë me shumë gjasë partia e Metës nuk merr asnjë bashki. Kjo do të thotë se zgjedhjet vendore do jenë një betejë shumë e fortë dhe në opozitë nuk ka më harmoni e besueshmëri./sot
