Pa mbushur një muaj nga protesta e disa banorëve dhe militantëve të Partisë Demokratike, kreu i opozitës, Lulzim Basha, është braktisur nga banorët që preken nga ndërtimi i Unazës së Madhe. Ndërsa PD dhe LSI lajmërojnë çdo ditë në orën 17:00 protestën për të kundërshtuar projektin, banorët kanë ulur mbështetjen ndaj tyre. Siç tregojnë edhe fotot, protesta ka firuar dhe tregon pjesëmarrjen më të ulët nga fillimi i saj. Teksa kryetari i Partisë Demokratike jepte deklaratën për mediat, përreth tij ishte një numër i pakët i njerëzve.
Gjatë ditës së sotme, mediat transmetuan pamje të ndryshme të banorëve të cilët kanë filluar të gjejnë zgjidhje përmes komunikimit me Bashkinë e Tiranës dhe ARRSH, duke pranuar zgjidhjet e ofruara nga këto institucione. Ka pasur edhe nga ata qytetarë, siç ishte rasti i Ukë Çelkolajt, i cili pas takimit me kryebashiakun Veliaj, pranoi vullnetarisht që të shembte ndërtimet që prekeshin nga projekti i Unazës së Madhe. Gjithashtu ka pasur edhe nga ato familje që kanë pranuar ofertën e Bashkisë së Tiranës për të përfituar banesa sociale pa afat me të gjitha kushtet e duhura.
Protesta u dëmtua nga vetë Kryetari i Partisë Demokratike, Lulzim Basha, i cili ka lidhje të hershme me një prej firmave fituese për zhvillimin e projektit, Viktoria Invest, pasi në kohën që drejtonte Bashkinë e Tiranës, kjo kompani ishte përfituese kryesore e tenderave. Por në çdo moment, si PD dhe LSI, janë treguar të kujdesshëm për të lavdëruar në publik cilësinë e kësaj kompanie, duke hedhur dyshime të forta në publik për konfliktin e interesit midis tyre.
Si të mos mjaftonte kjo, disa prej deputetëve që nuk janë të Qarkut të Tiranës, siç është rasti i Klevis Balliut, mediat i kanë publikuar foto dhe video të jetës së luksit, në një kohë që flet për varfërinë dhe puna e parë e tij është deputet i PD. Kjo ishte një tjetër arsye, që me sa duket, i ka ulur moralin kësaj proteste.
I ndodhur në këto kushte kur mbështetja e banorëve bie përditë, Basha po tenton ta mbajë gjallë protestën duke sjellë grupin parlamentar demokrat dhe grupseksionet e PD në Tiranë. Pamjet e sotme tregojnë se as kjo gjë nuk ka sukses, pasi kishte më shumë protestues nga shoferët e bllokuar, gazetarët që ndiqnin ngjarjen, sesa banore reale të unazës. Krahas braktisjes nga banorët e unazës, protesta e PD sot kishte kohëzgjatjen më të shkurtër të zhvillimit të saj./LEXO.AL
