Mes “Shqipëria Bëhet” e udhëhequr nga Adriatik Lapaj dhe “Nisma” e Endri Shabanit, situata sa vjen e agravon. Përveç dy kryetarëve, anëtarëve dhe simpatizantëve respektiv, duket se në betejë janë futur edhe fiset e dy ish- miqve dhe ish-aleatëve. Kështu debati për mandatin e vetëm të fituar nga koalicioni “Nisma Shqipëria Bëhet” vijon të përshkallëzohet, me përfaqësuesit kryesorë të tij, Adriatik Lapaj dhe Endri Shabani, në qendër të një përplasjeje publike.
Për këtë çështje ka reaguar edhe djali i Ana Dajkos, (Teze e Adriatik Lapajt), e cila ndodhet e para në listën zyrtare të koalicionit.
Në një prononcim për Euronews Albania, ai shpreh keqardhjen për situatën e krijuar dhe thekson se, sipas tij, mandati i takon Adriatik Lapajt.
“Mandati i koalicionit ‘Nisma Shqipëria Bëhet’ i takon zotit Adriatik Lapaj dhe Lëvizjes Shqipëria Bëhet, si më i votuari në listën zgjedhore. Ime më, Ana Dajko, ashtu si 45 kandidatë të tjerë në listën e mbyllur, ka dhënë dorëheqjen nga kandidimi përpara shpalljes së rezultateve. Pas zhvillimeve të fundit, çdo vendim i mëtejshëm i takon kryesisë së Lëvizjes ‘Shqipëria Bëhet’,” – u shpreh ai.
Situata mbetet e tensionuar brenda koalicionit, me rrezik për thellim të krizës politike dhe organizative në radhët e tij. Kujtojmë që ditën e djeshme u publikuan disa audio-kërcënime të simpatizantëve të Lapajt ndaj Endri Shabanit. Ndërkohë e gjitha ka nisur nga “dajo” i Endri Shabanit i cili u dorëhoq nga dorëheqja si kandidat i Listës së mbyllur. Po ditën e djeshme partia e Lapajt nëmërmjet një deklarate kërko që të ulen sërish në tavolinē për të përmbyllur marrëveshjes parazgjedhore, por nga Shabani dhe forca politike që drejton, “Nisma”, ende nuk ka asnjë përgjigje.
