Dy të vdekur dhe tre të plagosur rëndë është bilanci i aksidenteve në rrugët e vendit, gjatë kësaj të diele të 31 gushtit.
Rrugët u përgjakën që në orët e para të mëngjesit, kur dy të rinj humbën jetën në qytetin e Peqin, pasi mjeti me të cilin udhëtonin doli nga rruga dhe u përplas me shkallët e një banese
Ngjarja ndodhi në vendin e quajtur “Ura e Teqes”, ku viktima mbetën ky të rinjtë Gabriel Lluca dhe Denis Korbi. Pavarësisht ndërhyrjes së shërbimeve të emergjencës, të rinjtë kanë ndërruar jetë në vendngjarje si pasojë e plagëve të rënda.
Sipas informacioneve të deritanishme dyshohet se mjeti lëvizte me shpejtësi tej normave si pasojë e së cilës dhe përplasja ka qenë shumë e fortë dhe fatale. Ekspertët po punojnë për zbardhjen e plotë të rrethanave të aksidentit tragjik.
Orët e mbrëmjen shënuan një tjetër aksident të rëndë, te kryqëzimi i Ishull Shëngjinit, në dalje të Lezhës. Dy makina u përplasën me njëra-tjetrën, duke lënë të plagosur tre persona, të cilët u dërguan me urgjencë drejt Spitalit të Traumës. Përplasja mes dy makinave ka qenë e fortë, duke bërë që njëra prej tyre të përfundojë në një parcelë në anë të rrugës.
Paraprakisht, dyshohet se njëra makinë i ka prerë rrugën mjetit tjetër që lëvizte në drejtim të Tiranës, por grupi hetimor vijon hetimet për zbardhjen e plotë të ngjarjes.
