Viktimë nga mashtrimet nuk bien vetëm individët, por edhe kompanitë e korporatat, madje dhe klubet e futbollit. Hakerat po bëjnë namin dhe po kthehet në shqetësim serioz. Së fundmi, është klubi i Lacios ka rënë pre e një mashtrimi financiar online, duke pësuar një dëm prej rreth dy milionë eurosh. Ekipi, që ka për drejtor sportiv shqiptarin Igli Tare, ka bërë gabimisht një pagesë prej dy milionë eurosh për Fejenordin, ish-skuadrën e mbrojtësit Stefan De Vrij, që është pranë largimit tashmë nga ekipi roman.
Lacio paguan këste ndaj ekipit holandez që prej vitit 2014, e këtë vit duhej të derdhte edhe një shumë për shkak të transaksionit të parashikuar. Por, sipas gazetës “Il Tempo”, një “e-mail” mashtrues i nisur nga “hacker”-a por i kamufluar sikur vinte nga Fejenordi, bëri drejtuesit që të dërgojnë para në një llogari në “parajsa fiskale”, të administruar nga një bankë holandeze.
Lacio u informua mbi mashtrimin vetëm pasi Fejenordi raportoi se nuk kishte marrë pagesën për mbrojtësin De Vrij, duke bërë edhe denoncimin, që gjithsesi i ka rikuperuar vetëm 200 mijë euro. Pjesa tjetër ka lënë shenjë në sistemin bankar holandez, por skuadra e futbollit italian ende nuk ka gjetur autorët e mashtrimit.
