Një histeri e paimagjinueshme televizive po ndodh tani në Bularat, aty ku po varroset ektremisti grek Kostandinos Kaçifas i cili qëlloi me armë policinë dhe për pasojë u vra nga RENEA.
Televizionet informative si “Report tv”, “Ora News”, apo “Fax News”, kanë rënë në “kurthin” e medieve greke të cilat ishin të interesuara ta pasqyronin sa më gjatë dhe sipas interesave të tyre këtë ceremoni ku morën pjesë edhe zyrtarët shqiptarë si Vangjel Dule, Vangjel Tavo, apo ish-ministri Spiro Ksera.
Vangjel Dule foli edhe në greqisht duke kërkuar të zbardhej e vërteta e kësaj ngjarjeje por askush nga gazetarët tanë nuk e pyeti Dulen se për ç’të vërtetë e kishte fjalën?!
Familjarët dhe qytetarë të tjerë ardhur nga Greqia valvitën flamurin grek dhe brohoritën: “Kostandino ti jeton, je udhëheqësi ynë”. Po kështu, grupimi i qytetarëve këndoi edhe një himn të Vorio-Epirit, momente këto që televizionet tona informative u kujdesën t’i bëjnë jehonë përmes transmetimit të pandërprerë.
Por nuk mbaron këtu! Televizionet tona po transmetojnë live edhe kortezhin drejt kishës, me viktimën në arkivol, mbështjellë me flamur grek dhe fytyrën zbuluar.
Ky “nderim” i mediave shqiptare për një ekstremist grek, nuk është parë as në rastet kur në krye të detyrës janë vrarë djem të Forcave të Armatosura Shqiptare.
Vlen të përmendet se i vetmi televizion informativ që ka mbuluar në mënyrë profesionale e të kontrolluar këtë ngjarje, është News 24.
Është e habitshme se si media shqiptare po e mitizon një ekstremist kur 14 deputetë grekë akuzuan TV kombëtar STAR për lajme të rreme e manipulim të opininit publik. Madje vetë kryetari i parlamentit grek nuk pranoi kërkesën e Agimit të Artë për një minutë heshtje për Kaçifas.
Televizionet tona, nuk u mjaftuan as me një e as me dhjetë minuta por me orë të tëra live.(newsbomb)
