Ditët e fundit në media në Meksikë po qarkullon një histori e pazakontë tradhtie dhe dashurie, ku një murator kishte ndërtuar një tunel poshtë shtëpisë së tij, i cili lidhej me shtëpinë e fqinjës së tij të martuar, të cilën e kishte të dashur.
Muratori i njohur me emrin Alberto kishte arritur të ndërtonte vendkalimin sekret për të takuar të dashurën e tij, Pamela, në qytetin e Villas del Prado në Tijuana, ndërsa bashkëshorti i saj ishte në punë si roje sigurie.
Çifti ia kishte dalë të mbante sekrete lidhjen jashtëmartesore, derisa një ditë burri i Pamelës i zbuloi pasi u kthye herët në shtëpi.
Jorge pa dikë në banesë që më pas u zhduk dhe pasi e ndoqi gjeti pas kolltukut një tunel, të cilin pasi e ndoqi e çoi në banesën e fqinjit të tij, Alberto.
