Ish-shefi i Shërbimit të Sigurimit Shtetëror të Serbisë, Franko Simatoviç, i dënuar me 15 vjet burg para gjykatës në Hagë, është liruar me liri të përkohshme dhe po arrin në Serbi, raporton B92.
Arsyeja e këtij vendimi gjyqësor është se në kushte burgu nuk mund të marrë terapinë që i nevojitet. Simatoviç u arrestua së bashku me ish-shefin e Shërbimit të Sigurimit Shtetëror të Serbisë, Jovica Stanishiç, në vitin 2003, kur u ngrit aktakuza.
Pas gjykimit të parë në 2013, të dy u shpallën të pafajhëm, por prokuroria bëri ankim. Siç shkruan B92, Simatoviç kaloi më shumë se tetë vjet burg, ndërsa Stanishiç më shumë se shtatë.
Në vitin 2021, Stanishiç dhe Simatoviç u shpallën përgjegjës për ndihmën dhe nxitjen e akteve kriminale të vrasjes si shkelje e ligjeve dhe zakoneve të luftës dhe krimeve kundër njerëzimit, si dhe akteve kriminale të dëbimit, transferimit të detyruar dhe persekutimit të popullsisë kroate dhe muslimane si krime kundër njerëzimit të kryera nga forcat serbe pas pushtimit të Shamacit të Bosnjës në prill të vitit 1992. Për këtë, ata morën secili nga 12 vjet burg.
Më 31 maj 2023, Dhoma e Apelit e Mekanizmit të Mbetur për Gjykatat Penale Ndërkombëtare (MICT) në Hagë i shpalli fajtorë ish-drejtuesit e Shërbimit të Sigurimit Shtetëror të Serbisë, për vrasjen e kryer në qershor 1992 në Kroaci.
Këshilli i Apelit i Mekanizmit të Mbetur ua ka rritur dënimin me 15 vjet burg për krime të kryera nga forcat serbe në territorin e ish-Jugosllavisë. Në apelin e saj, prokuroria pretendoi se shumë krime në Kroaci mund t’i atribuoheshin Stanishiçit dhe Simatoviçit, sepse ato ishin kryer nga njësitë që ishin nën kontrollin e tyre.
