Një trëndafil i kuq dhe një shënim u ngjitën këtë mëngjes në portën e rezidencës zvicerane ku vdiq artistja legjendare Tina Turner:
“Mendoj se është mirë që erdha herët sot.
Faleminderit dhe lamtumirë Tina. Ju jeni thjesht më e mira”.
“Për shkak se ajo është mbretëresha, mbretëresha e të gjitha grave, unë e dua Tinën,” u shpreh një fanse sllovene 48-vjeçare jashtë rezidencës së saj zvicerane, ndërsa turma me njerëz u rreshtuan gjatë gjithë natës për t’i bërë homazhe në shtëpinë ku këngëtarja ndërroi jetë.
Tina Turner u vendos në Zvicër në vitin 1995 me partnerin e saj, gjermanin Erwin Bach.
Në vitin 2013, tre muaj pas martesës së tyre dhe pasi mori nënshtetësinë zvicerane, ajo hoqi dorë nga shtetësia amerikane.
Gruaja shpërthyese, e cila i vuri flakën skenave dhe turmave anembanë botës me një zë unik dhe prani të zjarrtë në skenë që thoshte se kishte frikë të mos plakej, u shpreh për The Guardian në prill se shpresonte të mbahej mend si ‘mbretëresha e rock & roll.
Duket se ia doli, pasi të gjithë po e cilësojnë si të tillë edhe pas vdekjes.
Basketbollisti Magic Johnson foli për humbjen e “mbretëreshës legjendare të rokut”, ndërsa Mick Jagger bëri homazhe për një artiste “aq të talentuar”, por edhe “të ngrohtë, me humor dhe bujar”.
Ronnie Wood foli për humbjen e “mbretëreshës së rock-ut dhe shpirtit”.
“Fjalët ‘legjendë’, ‘idhull’, ‘diva’ dhe ‘superstar’ shpesh keqpërdoren, megjithatë Tina Turner i mishëron të gjitha dhe shumë të tjera,” tha Mariah Carey.
Gloria Gaynor kujtoi se Tina Turner “hapi rrugën për kaq shumë gra në rock, të zeza apo të bardha”.
Presidenti i SHBA Joe Biden përshëndeti “të vetmen grua që fitoi në kategoritë pop, rock dhe RnB” në Grammy Awards, “një dëshmi e artit, krijimtarisë dhe popullaritetit të saj të madh” me audienca të ndryshme.
“Me vdekjen e Tina Turner, bota ka humbur një ikonë,” tha presidenti i Konfederatës Zvicerane Alain Berchet.
