Berisha ishte i detyruar që të mbronte ose ta eliminonte Mediun
Ish-ambasadori amerikan në Tiranë, Xhon Uidhers, i shpallur armik nga Sali Berisha, i ka raportuar Departamentit Amerikan të Shtetit se ish-kryeministri Berisha mbylli Parlamentin për të shpëtuar Fatmir Mediun nga arrestimi për tragjedinë e Gërdecit.
Në një kabllogram drejtuar DASH, Uidhers shkruan se Ina Rama kishte bërë prangat gati për Mediun, por Berisha e shpëtoi. Berisha ishte i detyruar që të mbronte ose ta eliminonte Mediun, pasi nëse Mediu futej në burg, ai ishte gati që të dëshmonte për implikimin e Shkëlzen Berishës, vetë Berishës, Fahri Balliut etj., në biznesin e vdekjes në Gërdec.
“Sesioni parlamentar nuk i dha fund një pjese të dramës. Sipas një thashethemi, prokurorja e Përgjithshme, Ina Rama, do të paraqiste një kërkesë për arrestimin e ish-ministrit të Mbrojtjes, Mediu, por Byroja e Kuvendit papritmas tha se data 28 korrik do të jetë dita e fundit e sesionit. Miratimi nga Parlamenti i anëtarëve të Gjykatës së Lartë solli një fund të mirëpritur të grindjeve mes Presidentit dhe PD.
Ajo shënoi edhe fillimin e pushimeve të muajit gusht të Parlamentit, duke i dhënë kohën klasës politike shqiptare për të pushuar dhe për t’iu drejtuar plazheve, para se të premtonin diçka tjetër për sesionin. Në fund, edhe Presidenti, edhe Kryeministri mund të pretendojnë fitoren që pretendojnë të dyja palët, por jo të gjitha, për atë që ata donin jashtë Parlamentit”, shkruan ish-ambasadori, në një nga kabllogramet dërguar Departamentit të Shtetit.
Ish-ambasadori amerikan në Tiranë, John Uidhers, shkruan se Berisha filloi të kapte drejtësinë pas Gërdecit. “Parlamenti mbylli sesionin e tij të verës më 28 korrik, me miratimin e gjashtë të të propozuarve nga Presidenti Topi për në Gjykatën e Lartë. Miratimi erdhi pasi kryeministri Berisha udhëzoi deputetët e PD-së për të miratuar kandidatët. Miratimi i kandidaturave mbuloi edhe luftën disamujore mes kryeministrit Berisha dhe Presidentit Topi mbi kandidatët për në Gjykatën e Lartë. Në këmbim thuhet se Presidenti Topi ra dakord me ndryshimet e kërkuara nga Berisha në qeveri, së bashku me kandidatin e tij si ministër i Mbrojtjes. Topi gjithashtu ra dakord të caktojë anëtar në KLD një ish-avokat të Berishës”./Pamfleti
