Kjo e hënë regjistroi ngjarjen e parë me sfond kriminal në fushatën zgjedhore. Një mbështetës i Partisë Demokratike u ndalua në Lushnje, pasi ofroi para për të marrë kartën e identitetit të një personi me qëllim blerjen e votës.
Analisti Frrok Çupi komentoi rastin në fjalë duke e cilësuar vjedhjen e votës një krim të rëndë.
Çupi në një intervistë në “News Line” në ABC News u shpreh se pavarësisht të gjithave PD nuk mund ta ndryshojë rezultatin.
“Kur vjedhja e votës ndodh që në fillim të fushatës është një ogur i keq. Partitë që kanë në plan të shtojnë votat duke i vjedhur, do bëhen gjithnjë e më agresive, dhe kjo është një rrezik tani.
PD është një parti që nuk rron dot pa vjedhur vota. Asnjëherë nuk ka pasur shumicë edhe kur ka qenë në formën më të mirë të saj, teknologjinë e vetme që ka përdorur është vjedhje.
Pas vjedhjes së votës nga PD në ’96 që deformoi rezultatin, pas asaj përjetuam luftën e ashpër, mes veriut dhe jugut dhe luftën civile. Qe një tragjedi që nuk u mbyll kurrë edhe pse forcat ndërkombëtare arritën të ruanin qetësinë në vend.
Por sa më shumë modern të jetë një shtet, instrumentet primitivë e kriminalë bëhen më agresivë. Me njohjet që kam jam i sigurt se PD tani po zhvishet edhe nga elementë normale.
Sa kohë të ketë PD dhe Berishë, do kemi sulme, vjedhje votash demokracia e votës në Shqipëri e rrezikuar”, tha ai.
