Ish-këshillari i Lulzim Bashës në fushatën e vitit 2017, Neritan Sejamini ka lëshuar kritikë të ashpër në drejtim të selisë blu lidhur me deklaratat mbi ekonominë. Më konkretisht akuzat i janë drejtuar deputetes, pedagoge e fakultetit Ekonomik, Jorida Tabaku, pas deklaratës së saj për buxhetin e vitit 2019.
Në një postim në rrjetet sociale, Sejamini i konsideron “bejte” deklarata e PD-së për buxhetin.
“Ekonomia nuk është shkencë, por nuk është as bejte. Kur dëgjon bejtet e PD-së për buxhetin me “u ul”, “u ngrit”, “pakicë” “shumicë” dhe pasthirrma habitore dhe emocionale nuk di nëse duhet të tallesh apo ta kalosh edhe këtë gjë, edhe këtë herë. Ekonomia nuk është shkencë vërtet, por është shumë më e thellë se bejtet dhe shpjegimet me “u ul”, “u ngrit” si llogaritar province. PD ka nevojë urgjente për një gjysëm ekonomisti. Madje përballë këtij buxheti dhe këtyre politikave ekonomike vrastare e shkatërruese të qeverisë edhe një çerek ekonomisti do shkëlqente”, shkruan Sejamini.
Deputetja demokatike Jorida Tabaku, përmes një deklarate për mediat nga selia blu, tha sot se koncesionet e qeverisë u kanë kushtuar qytetarëve 2.2 miliardë Euro dhe se buxheti për vitin 2019 është në interes të oligarkëve.
