Reagime të ashpra ka pasur nga opinioni publik në lidhje me intervistën e Xhisiela Malokut dhënë në ‘Open’ për gazetaren Eni Vasili.
Me sa duket, në fokus të debateve nuk ka qënë vetëm Xhisiela, por edhe gazetarët të cilët janë akuzuar nga opinioni publik, por edhe mes kolegësh për mënyrën sesi bëjnë gazetari.
Përmes disa postimeve të njëpasnjëshme në profilin e saj facebook, ish-redaktorja e Top Channel, pedagoge në UET, Albana Nexhipi ka shprehur zëmerimin e saj për mënyrën e llahtarshme, sipas saj të intervistave që i janë bërë vajzës duke shkruar se Xhisielën e bënë copa për të përfituar kredit elektoral.
“12 vjet në Top Channel dhe nuk i dhashe kurrë fryme një llahtarie të tillë! E tmerruar nga mënyra si po intervistohet dhe trajtohet ajo çupë në emisionin e Eni Vasilit. Llahtar”, shkruan Nexhipi
Në postimin tjetër ajo i drejtohet koleges Eni Vasili me gjuhë të ashpër duke i shtruar një pyetje:
“Je në terezi moj? Të duket gazetari ky presion që po përdor mbi të gjorën? Tmerr!!! Dhe TURP!!”
“O Eni Vasili! Po ta tha moj 100 herë si do ta ndihmosh: mjaft me dhunë psikologjike të tha. E ti sikur je hetuese e jo gazetare kembëngul se unë kam intervistuar aq e kaq gra, më thuaj të vërtetën. Je në TEREZI MOJ? Të duket gazetari ky presion që po përdor mbi të gjorën? Tmerr!!! Dhe TURP”, vijon ajo.
“E kuptoni ju sa e rëndë është për atë çupë etiketimi “gënjeshtare”. Gënjeu për dhunën, na gënjeu për taksinë… Sinqerisht s’jeni në terezi! Tjetra bën hesap me kokën e vet e te familjarëve, e ju doni t’u thotë “të vërtetën”. Ju duket edhe hyner i madh madje, që zbuluat që po ju gënjente korba! Pika që s’ju bie, me gjith’ dell investigativ gazetaresk!!!”-shkruan Nexhipi duke e përfunduar bllokun e statuseve me fjalët:
“Ja, këta jemi! Një tufë korbash e sorrash, që ushqehemi me jetë e shpirtra të mjerësh! Sa më dhëmb kjo çupë!”/TemA
