Aktivistja e njohur shqiptaro-amerikane, Evi Kokalari ka shpërthyer ndaj Partisë Demokratike dhe sidomos ndaj ish-kryeministrit Sali Berisha, duke demaskuar pazaret, manipulimet dhe hipokrizinë që, sipas saj, kanë mbërthyer këtë forcë politike. Ajo rrëfen publikisht zhgënjimin e thellë nga një strukturë që premtoi ndryshim me “Rithemelimin”, por që në thelb nuk bëri gjë tjetër veçse ricikloi të njëjtin moral të kalbur dhe të njëjtat figura të konsumuara. Në një reagim që i ka dhënë jehonë një përmbledhjeje të qëndrimeve të saj nga Redi Minga, Kokalari bën të qartë se qëndrimet e saj nuk kanë qenë as personale, as emocionale, por ideologjike dhe të mirëarsyetuara.
“Nuk e di kush është Redi Minga, por dua ta falenderoj për këtë përmbledhje dhe artikulim të qëndrimeve të mia gjatë këtyre tre viteve në politikën Shqiptare. Ajo që dua të theksoj është se konservatorizmi nuk është ideologji apo doktrinë, por është filozofi jete, dhe kushdo që është konservatorë, do s’do, i shprehë këto bindje me akte dhe jo fjalë dhe shkrime ‘akademiko-pseudointelektualësh’ si ata PD-së. Them pseudointelektualësh, sepse nëse nuk ke kapacitetin të kuptosh çfarë është në fakt konservatorizmi, atëherë s’ke kapacitetin intelektual as për ta shpjeguar atë me shkrime dhe artikuj gazetash, pavarësisht talentit në shkrim.
Kjo është arsyeja pse kam një antipati të theksuar për grupin të vetëquajtur ‘konservatorë’ të PD-së, që kanë formuar think tanks dhe bëjnë konferenca në emër të konservatorizmit, madje duke ju ngjitur dhe konservatorëve tanë në SHBA. Por dhe LaCivitën që sollën për t’ju shtirur sovranit si të djathtë, ju kthye në boomerang që pasoi me talljen masive të votuesve, ose mos votuesve, në 11 Maj! Grupi pseudo-konservatorë i PD-së është thjeshtë duke kopjuar doktrinat e shkruara nga të tjerë pa e përvetësuar atë, ndryshe ashtu si dhe unë, do ishin larguar nga PD-ja siç j’u thashë të bënin në 2023, por refuzuan dhe qëndruan në krahë të Berishës duke ndyer të djathtën Shqiptare me konferenca mediokre. Ata refuzuan sepse prisnin një kockë, dhe një kockë Berisha nuk ja u dha kurrë. Kaq e meritonin!!”, shkruan Kokalari.
Analiza e Redi Minga me qëndrimet e Evi Kokalarit
Në një kohë kur e djathta shqiptare ka nevojë për unitet dhe moral, largimi i Evi Kokalarit nga krahët e Sali Berishës ngre pyetje serioze për drejtimin e Partisë Demokratike dhe për cilësinë e lidershipit që i ka mbetur opozitës shqiptare. Evi Kokalari, një zë i guximshëm që solli një frymë të re konservatore nga diaspora amerikane, nuk u tërhoq sepse “u lodh”, por sepse pa nga brenda një sistem të kalbur që refuzon të ndryshojë. Ajo pa një PD që edhe pse u shpall si “Rithemelim”, në fakt rithemeloi po të njëjtat skema të vjetra klienteliste, pa meritokraci dhe pa moral politik.
1 – Manipulimet brenda PD – Thika pas shpine për çdo idealist
Kokalari denoncoi publikisht manipulimin e zgjedhjeve në Forumin Rinor të PD-së, ku një grup i lidhur me Belind Këlliçin – me heshtjen e Sali Berishës – rrëmbeu votën e lirë dhe shpresën e rinisë. Si mund të shpresojë një popull te një opozitë që gënjen vetveten dhe më pas i kërkon besimin qytetarëve?
2 – Sulmet mafioze dhe heshtja e Berishës – Toleranca ndaj devijimit
Kur Evi u sulmua nga “grupi gangsteresh”, siç i cilësoi ajo, Berisha nuk reagoi. Ky ishte momenti kur idealistja e rritur me frymën e ligjit dhe drejtësisë amerikane e kuptoi: edhe Rithemelimi ishte thjesht një iluzion për të mbrojtur një rreth të ngushtë interesash personale dhe politike.
3 – PD si pronë private – Zëvendësim i Ramës me një ‘Rama blu’
Evi Kokalari nuk heshti kur pa që PD po shndërrohej në një instrument mbrojtës të interesave të një klani, e jo më një parti që përfaqësonte vlerat e konservatorizmit dhe të lirisë. Ajo akuzoi publikisht Berishën se po përdorte PD-në për pazare personale dhe për të mbrojtur “djemtë e bindur” – jo për të ngritur një alternativë kombëtare ndaj regjimit të Edi Ramës.
4 – Kujt i shërben përjashtimi i Kokalarit?
Sot, kur e djathta ka nevojë për figura të pastra dhe ide të reja, largimi i Evi Kokalarit është një kambanë alarmi për çdo shqiptar që mendon se PD-ja është rruga e shpëtimit. Ajo nuk iku nga frika, por u largua me dhimbjen që një projekt për ndryshim u përdhos nga brenda, nga njerëz që nuk kanë asnjë lidhje me të djathtën reale.
Koha e klaneve ka mbaruar – Opozita duhet të rilindë nga e para
Evi Kokalari tregoi se është një zë i lirë, dhe e vërteta e saj djeg për ata që janë mësuar të bëjnë pazare në emër të demokratëve. Rithemelimi pa reformim është mashtrim. Nëse opozita nuk pastrohet nga brenda, nuk ka asnjë shans të fitojë nga jashtë. Në fund të ditës, historia do e kujtojë Evi Kokalarin si një idealiste që u përplas me murin e vjetër të hipokrizisë politike shqiptare – dhe pati guximin të flasë. /Nga Elmas Bogdani/Sot
