Joana Qeleshi është zgjedhur kryetare e Dhomës së Avokatisë, duke zëvendësuar Saimir Vishën.
Qeleshi, e njohur për afërsinë me Argita Berishën, e nisi punën si gjyqtare në Gjykatën e Durrësit më 28 dhjetor 2011. Në vitin 2013 u emërua në krye të Gjykatës së Durrësit nga presidenti i asaj kohe, Bujar Nishani, që drejtonte Këshillin e Lartë të Drejtësisë, institucion që u shkri me reformën në drejtësi dhe u zëvendësua me Këshillin e Lartë Gjyqësor. Në atë kohë, emërimi i saj pati polemika pasi Gjykata e Durrësit është një gjykatë karriere, në të cilën nuk mund të bëhet emërim direkt nga Shkolla e Magjistraturës.
Në tetor të vitit 2019, ajo u dorëhoq nga ky post, duke i shpëtuar procesit të vettingut. Asokohe ajo e argumentoi dorëheqjen me shfrytëzimin e një mundësie që i ishte dhënë në sektorin privat. Qeleshi ishte prej 19 muaj nën hetim nga Komisioni i Pavarur i Kualifikimit për ligjshmërinë e pasurive, pastërtinë e figurës dhe aftësisë profesionale.
LEXO EDHE:
Ankandi i pazakontë i PD-së për kandidaturën për Bashkinë e Tiranës
Më 6 nëntor, KPK vendosi që procesi i rivlerësimit për Qeleshin duhet të ndërpritej bazuar në nenin G të Kushtetutës, i cili u njeh subjekteve të drejtën për t’u larguar nga sistemi me dorëheqje. Për pasojë, Qeleshi humbi të drejtën për të punuar në sistemin e drejtësisë për një periudhë 15-vjeçare.
Në vitin 2016, Qeleshi u lakua dhe u akuzua për vendimin për të njohur Pal Seçunin si pronar të 45 mijë metra katrorë tokë e pemishte, më parë pronë e shtetit në Gjirin e Lalzit, Bashkia Durrës. Në 24 mars 2017, ajo i shpëtoi shkarkimit nga Këshilli i Lartë i Drejtësisë, i mbledhur me kërkesë të ministrisë së Drejtësisë.
Më 10 shtator të vitit 2007, Qeleshi u pajis me prokurë të posaçme nga biznesmeni i përfolur serbo-boshnjak-britanik Damir Fazlliç, mik i Sali Berishës, për të bërë regjistrimin e një kompanie të tij në Qipro. Qeleshi punonte në atë kohë në studion “Kola&Associates” të avokates tjetër Flutura Kola, ish-ortake në biznes e Argita Berishës.
