Kryetari i degës së PD0së Alibejat në Fier, Agron Kapllanaj ka vendosur që t’i përgjigjet liderit historik të PD-së, Sali Berisha pas akuzave që ky i fundit hodhi ndaj tij. Me anë të një postimi në rrjetet e tij sociale ditën e djeshme , Kapllanaj tha se të gjitha ato që Berisha thotë për të janë akuza të stisura, duke kundërshtuar pretendimet se i bindet kryeministrit Edi Rama.
“Sali Berisha në gënjeshtrën e radhës, të cilat ka kohë që ua servir demokratëve, së fundmi për të gënjyer, ka zgjedhur garën e stisur brenda PD-së për kryetar. Njeriu që për më shumë se 30 vjet nuk bëri kurrë garë dhe nuk njohu asnjëherë vlerën e votës brenda partisë, ka hyrë në një garë imagjinare ku konkurron me veten dhe fantazmat e atyre që ka përjashtuar ndër vite nga PD.
Sali Berisha dhe ata që e ndjekin verbërisht nga pas e dinë shumë mirë se kjo nuk është garë për të zgjedhur kryetarin e PD! Kjo e ashtuquajtur garë, është thjesht dhe vetëm vazhdimi i përpjekjeve për të mbajtur peng PD dhe një pjesë të demokratëve për shkak të shpalljes non grata nga SHBA.
Për këtë hall të vetin, unë nuk e ndihmoj dot Sali Berishën, as demokratët e Fierit nuk e ndihmojnë dot me ankesat që ka nisur në Departamentin e Shtetit, Sali Berisha”, shkrua ai. Më tej Kapllanaj shkruan se Berisha është katandisur si mos më keq, dhe nuk mund të mbledhë as 200 demokratë në Fier.
Ndër të tjera, demokrati falënderon edhe SHBA, pasi sipas tij vetëm pas “non gratës” të gjithë njohën fytyrën e vërtetë të Berishës. “Je katandisur si mos më keq doktor, i bëre thirrje gjithë qarkut Fier për takim dhe me zor mblodhe 200 vetë në atë sallë ku pak nga pak edhe ata të braktisën gjatë fjalim-mashtrimit tënd! Faleminderit SHBA që na bëre të njohim Sali Berishën e vërtetë!
Doktor, t’i kishe gjithë mundësitë ta mbyllje me nder dhe si burrë – shteti por Zoti nuk mund ta jepte këtë privilegj të pamerituar, ndaj dhe të bëri ta mbyllje ashtu siç e meriton, me TURP”, nënvizoi Kapllanaj.
