Më shumë se 6,500 punëtorë imigrantë nga India, Pakistani, Nepali, Bangladeshi dhe Sri Lanka kanë vdekur në Katar, që kur këta të fundit fituan të drejtën për të organizuar Kupën e Botës 10 vjet më parë.
Gjetjet, të përpiluara nga burime qeveritare, nënkuptojnë se mesatarisht 12 punëtorë imigrantë nga këto pesë vende të Azisë Jugore kanë vdekur çdo javë që nga nata e dhjetorit 2010 kur rrugët e Dohas ishin mbushur me turma eksaltike që festonin fitoren e Katarit.
Të dhënat nga India, Bangladeshi , Nepali dhe Sri Lanka zbuluan se kishte 5,927 vdekje të punëtorëve imigrantë në periudhën 2011-2020. Më vete, të dhënat nga ambasada e Pakistanit në Katar raportuan 824 vdekje të tjera të punëtorëve pakistanezë, midis 2010 dhe 2020.
Numri total i vdekjeve është dukshëm më i lartë, pasi këto shifra nuk përfshijnë vdekjet nga një numër vendesh që dërgojnë një numër të madh punëtorësh në Katar, duke përfshirë Filipinet dhe Kenia. Nuk përfshihen gjithashtu vdekjet që kanë ndodhur në muajt e fundit të vitit 2020.
Në 10 vitet e fundit, Katari ka nisur një program ndërtimi të paprecedentë, kryesisht në përgatitje për turneun e futbollit në vitin 2022. Përveç shtatë stadiumeve të reja, dhjetëra projekte të mëdha janë përfunduar ose janë në zhvillim e sipër, duke përfshirë një aeroport të ri, rrugë, sistemet e transportit publik, hotelet dhe një qytet i ri, i cili do të presë finalen e Kupës së Botës.
Ndërsa të dhënat e vdekjeve nuk kategorizohen sipas profesionit ose vendit të punës, ka të ngjarë që shumë punëtorë që kanë vdekur të jenë punësuar në këto projekte infrastrukturore të Kupës së Botës, thotë Nick McGeehan, drejtor në FairSquare Projects, një grup avokues i specializuar në të drejtat e punës në Gji.
“Një pjesë shumë e rëndësishme e punëtorëve imigrantë që kanë vdekur që nga viti 2011 ishin në vend vetëm sepse Katari fitoi të drejtën për të organizuar Kupën e Botës”, deklaroi ai.
Ka pasur 37 vdekje në mesin e punëtorëve të lidhur drejtpërdrejt me ndërtimin e stadiumeve të Kupës së Botës, nga të cilat 34 janë klasifikuar si “jo lidhur me punën” nga komiteti organizativ i ngjarjes. Ekspertët kanë vënë në pikëpyetje përdorimin e termit sepse në disa raste ai është përdorur për të përshkruar vdekjet që kanë ndodhur në punë, duke përfshirë një numër punëtorësh që janë rrëzuar dhe kanë vdekur në kantieret e ndërtimit të stadiumit.
Gjetjet ekspozojnë dështimin e Katarit për të mbrojtur fuqinë e tij punëtore prej 2 milionë imigrantësh, apo edhe për të hetuar shkaqet e shkallës së lartë të vdekjeve në dukje midis punëtorëve kryesisht të rinj.
Punëtorët nga Nepali vendosën skela për lançimin e logos së Kupës së Botës. Ata fillojnë punën shumë përpara lindjes së diellit për të shmangur vapën.
