Këshilli i Emërimeve në Drejtësi ka rrëzuar presidentin Ilir Meta sa i takon emërimit të anëtarit të dytë të Gjykatës Kushtetuese. Presidenti ditën e enjte doli me një njoftim, ku bënte të ditur se ka pezulluar garën për Gjykatën Kushtetuese, në pritje të Kuvendit. Por KED i ka dhënë një goditje të fortë, duke mos e marrë parasysh propozimin. Ashtu siç gazeta e deklaroi një ditë më parë se Meta nuk ka respektuar ligjin me “pezullimin” e garës, kjo është mbështetur dhe nga KED.
Ligji për Gjykatën Kushtetuese e shpreh qartë se nëse një institucion nuk e emëron anëtarin brenda 30 ditëve, emërohet i pari në listë. Dje KED ka publikuar në Fletoren e Botimeve Zyrtare listën finale me 4 kandidatë për vendin vakant të shpallur nga presidenti. E para në listë është Arta Vorpsi, e cila është vlerësuar me 89.642 pikë, ndërsa më pas lista vijon me Fiona Papajorgjin me 88.785 pikë, Elsa Toskën me 85.428 pikë dhe Marsida Xhaferllarin me 82.000 pikë. Pra fakti që kjo listë është publikuar në QBZ, do të thotë se ajo ka hyrë në fuqi dhe sipas ligjit, automatikisht anëtar i Kushtetueses është Arta Vorpsi. Botimi vjen një ditë pasi Metës i skadoi afati dhe do të thotë se KED i ka dhënë një goditje të fortë presidentit, duke mos pranuar pezullimin.
Pra tentativat e kreut të shtetit për të shtyrë sa më shumë Kushtetuesen dhe për pasojë shkarkimin kanë dështuar. Në media ka pasur disa interpretime, por publikimi i listës do të thotë se Vorpsi është automatikisht anëtare. Vendimi i KED është publikuar që një muaj më parë dhe nuk ka detyrim të publikohet në QBZ, por në faqen zyrtare në internet. Detyrim është emërimi i anëtarit. Nëse kthehemi pas, më 18 tetor Besnik Muçi u emërua anëtar dhe vendimi u publikua në QBZ. Fakti që një ditë pasi i skadoi Metës afati, publikohet lista e KED, tregon qartë se Presidenti është jashtë loje dhe Vorpsi është anëtare.
Raporti
Gazeta ka siguruar dhe korrespodencën mes Këshillit të Emërimeve në Drejtësi dhe Presidentit. Ky i fundit kërkoi sqarime nga KED dhe dosjen për kandidatët. Në raportin që KED i ka dërguar ka hedhur poshtë të gjitha pretendimet e tij se nuk është respektuar radha e kandidatëve.
“Në pikën 3 të nenit 7/b të ligjit nr. 8577/2000 parashikohet se: ”Nëse ka më shumë se një vend vakant, Këshilli harton dy lista të veçanta, një prej të cilave është me kandidatët që vijnë nga radhët e gjyqësorit.….” Nga ana tjetër, në aktin nënligjor normativ, Vendimi nr. 5 datë 02.04.2019 “Për kriteret dhe procedurën e vlerësimit, pikëzimit dhe renditjes së kandidatëve për pozicionet vakante në Gjykatën Kushtetuese dhe të Inspektorit të Lartë të Drejtësisë”, në dispozitat kalimtare, pika 80 është parashikuar që: ”80. Për vendet vakante që tashmë janë krijuar në Gjykatën Kushtetuese të cilat i përkasin të njëjtit organ emërtese, pavarësisht nga përcaktimet e pikës 69 të këtij vendimi, duke mbajtur parasysh rrethanat e mungesës së njëhershmërisë në shpalljen e vendeve vakante, të kohës së tejzgjatur ndërmjet shpalljeve të konkurrimit për plotësimin e tyre dhe ekzistencën njëkohësisht të vendeve vakante me mandat të plotë dhe të pjesshëm, për të garantuar trajtimin e aplikimeve të kandidatëve në respektim të parimit kushtetues të barazisë përpara ligjit dhe të të drejtës së tyre të zgjedhjes së kandidimit për vende vakante të plotë ose të pjesshme,.
Këshilli do të procedojë me paraqitjen pranë organit përkatës të emërtesës të një liste të vetme përfundimtare të renditjes së kandidatëve sipas vendit vakant ku kanë shprehur interesin për kandidim”. Sipas KED, për këtë arsye, bazuar në këtë rregull kalimtar të vendosur për shkak të rrethanave të paparashikuara në ligj dhe që synojnë garantimin e barazisë së kandidatëve në konkurrim, në përfundim të veprimeve dhe procedurave të ndjekura për vlerësimin dhe pikëzimin e kandidaturave, Këshilli i Emërimeve në Drejtësi, ka proceduar me përgatitjen dhe miratimin e një liste të vetme përfundimtare të renditjes së kandidatëve të lejuar për plotësimin e vendit vakant në Gjykatën Kushtetuese ka proceduar me përgatitjen dhe miratimin e një liste të vetme përfundimtare të renditjes së kandidatëve të lejuar për plotësimin e vendit vakant në Gjykatën Kushtetuese./Kliti Topalli
