Komisioni Hetimor për shkarkimin e Presidentit Meta nuk arriti të miratojë sot emrat e ekspertëve që do të faktojnë shkeljet e kreut të shtetit.
Kjo mbledhje u shoqërua me tone të ashpra mes socialistit Spartak Braho dhe kryekomisionerit Alket Hysenaj. Braho e ka cilësuar si të turpshme që të përcaktohet në kërkesën e tyre se Meta është garanti i Kushtetutës.
Ndërkohë që është kërkuar që edhe institucionet e specializuara si SHISH të japin informacion në lidhje me takimet e presidentit nëse kanë pasur ndonjë dyshim për këto takime që në media janë cilësuar si të fshehta.
Braho: Është shpërndarë një material por unë dje e pata kohë e lexova në kapitullin e tretë, pika shkeljet e rënda kushtetuese. Nuk e di kush është marrë me formulimin, por thuhet: Presidenti i Republikës është kreu i shtetit shqiptar, garant i Kushtetutës dhe përfaqësues i unitetit kombëtar. Ku e kanë gjetur këtë?
Hyseni: Ku e kanë gjetur? Zoti Braho ajo është kërkesa e firmosur nga 49 deputetët. Ata e kanë formuluar siç e kanë gjykuar. Ajo kërkesë, është ashtu siç e kanë menduar ata, gjykojnë se jemi para atyre rrethanave dhe shkeljeve, dhe do ta vendosë komisioni që kemi apo nuk kemi te shkeljet e pretenduara.
Braho: Por nuk e kam unë aty, ti s’po më ndjek. Unë e ti, e kemi firmosur këtë kërkesë. Ku është gjetur kjo garant i Kushtetutës presidenti. Është turp, sepse këtë përdor presidenti Ilir Meta. Ka tre muaj unë jam garant, ndërkohë që nuk është garant.
Hyseni: Nuk ka rëndësi është në kuptimin figurativ. Këtë pyetje t’ia kishit bërë vetes përpara se të firmosnit dhe personit që është garant i unitetit të popullit, kur e thotë Kushtetuta.
Braho: Jo nuk e thotë Kushtetuta e atë.
Hyseni: Mos t’i hyjmë kësaj, kjo nuk hyn në çështje të tjera.
