Dje në media u raportua për një kalim të mundshëm të gazetarit Blendi Fevziu dhe emisionit “Opinion” në Top Channel.Në media thuhej se Ben Blushi i ka bërë një ofertë të parezistueshme Fevziut, që ky i fundit të braktisë Klanin dhe të kalojë në Top Channel.
Por, mesa duket e gjitha paska qënë një lojë për të rritur pazarin.
Burime për CNA.al bëjnë të ditur se Fevziu ka disa ditë që i ka mbyllur negociatat me Frangajn dhe përfundimisht do të vijojë të qëndrojë në Klan, ndërsa paga do të jetë 400-450 mijë euro në vit.
Fevziu me Ben Blushin kanë bërë një lojë të tillë sikur Fevziu ka marrë një ofertë të “çmendur” nga Top Channel.
Por ka një detaj, bilancet e Top Channel në vitet e fundit janë katastrofë. Kredi, detyrime dhe së fundi para pak kohësh u shitën edhe aksionet e “Lori Kafe”. Pra, vështirë se mund të ketë financa kaq të fuqishme Top Channel, për të shkuar në një pagë të tillë siç përflitet nëpër qarqet gazetareske për një rrogë prej 400-450 mijë euro në vit për emisionin “Opinion” dhe stafin e tij.
Ndërkohë pak muaj më parë, “Fiks Fare”, një nga emisionet me audiencën më të madhe në Top Channel, me një staf prej gati 30 vetësh, u kalua në vetëfinancim.
Gjë që tregon jo pak se Top Channel ka pasur vërtetë probleme financiare.
Gjithçka duket të jetë një lojë e Ben Blushit dhe Blendi Fevziut. Duke folur për rritje pagash dhe oferta marramendëse, nga ana tjetër mund të çojë në Klan një rritje të rrogës së drejtuesit të emisionit “Opinion”.
