Kombëtarja serbe e futbollit ka mbërritur pasditen e sotme në Tiranë, në prag të ndeshjes kundër Shqipërisë.
Ekipi është shoqëruar me masa të rrepta sigurie nga aeroporti i Rinasit drejt një hoteli pranë zonës së njohur si “Pallati me Shigjeta”, duke shmangur qëndrimin në qendër të kryeqytetit.
Përforcime policore janë vendosur përgjatë itinerarit dhe perimetrit të hotelit ku janë akomoduar futbollistët dhe stafi teknik i Serbisë, ndërsa autoritetet shqiptare kanë marrë të gjitha masat për garantimin e rendit dhe sigurisë në ditët në vijim.
Gjithëashtu Policia e Shtetit ka dhënë informacione shtesë në lidhje me masat për mbarëvajtjen e ndeshjes Shqipëri-Serbi. Në vijim të njoftimit të dhënë për planin e masave të hartuar nga Drejtoria e Përgjithshme e Policisë së Shtetit, me qëllim garantimin e rendit dhe sigurisë gjatë zhvillimit të ndeshjes së futbollit “Shqipëri–Serbi”, bën me dije se:
Rruga nga hoteli ku është akomoduar ekipi i futbollit të Serbisë që ndodhet në bulevardin “Gjergj Fishta”, deri në drejtim të stadiumit “Arena Kombëtare”, përmes bulevardit “Bajram Curri”, pasditen e sotme në orën 16:30 dhe ditën e nesërme në orën 18:45, do ketë kufizime të pjesshme deri ne 25 minuta në momentin që do eskortohet ekipi për në stadium për stërvitje pasditen e sotme dhe nesër për të zhvilluar ndeshjen.
“Policia e Shtetit është angazhuar maksimalisht që i gjithë aktiviteti të përfundojë me sukses porsa i përket masave të sigurisë, dhe në këtë kuadër me qëllim shmangien e incidenteve, apelojmë për mirëkuptim nga ana e qytetarëve, si dhe respektim të udhëzimeve të strukturave të policisë në terren.
Çdo sjellje apo veprim që cenon rendin dhe sigurinë publike do të trajtohet në përputhje me ligjin dhe me tolerancë zero”, njofton policia.
