Bilanci i viktimave të tragjedisë në një klub nate në Koçan të Maqedonisë së Veriut ka shkuar në 59.
Andrej Lazarov, futbollisti i Shkupit ka ndërruar jetë në spitalin e Shtipit ku është transferuar mëngjesin e sotëm pas tragjedisë në Koçan.
Lazarov ishte vetëm 25 vjeç. Ai nuk pësoi ndonjë djegie të rëndë, por thithi shumë tym gjatë momentit të rënies së flakëve.
Lazarov gjatë gjithë karrierës së tij ka luajtur për Metalurgun, Rabotniçkin, Tikveshin, Rudesin, Goricën dhe Shkupin.
Në mesin e viktimave është edhe drejtori i Qendrës Kulturore të Shtipit, Filip Stevanovski.
Filip Stevanovski ishte diplomuar në xhaz dhe ishte drejtor i Festivalit të Këngës për Fëmijë të Shtipit “Veselo Šturče”.
Në mesin e të vdekurve në tragjedinë në diskotekën e Koçanit është edhe muzikanti Gorgi Gorgiev, nga Strumica. Lajmin e hidhur e ka bërë të ditur kryetari i Komunës së Strumicës, Kostadin Kostadinov.
“Oh, fëmijë i bukur, ne kërkuam të gjitha listat, të gjitha spitalet, për të të gjetur, vetëm për të na thënë se ishe këtu…
Me pikëllim të pamasë mora lajmin për humbjen tragjike të bashkëqytetarit tonë Gorgi Gorgiev, i cili humbi jetën në zjarrin e tmerrshëm në Koçan. Strumica humbi një muzikant të talentuar, mik dhe njeri me zemër të madhe, i cili me muzikën e tij shpërndau gëzim dhe emocione.
Në këto kohë të vështira, mendimet dhe lutjet e mia janë me familjen e tij, të dashurit e tij dhe të gjithë ata që e njohën dhe e donin. U preftë në paqe dhe muzika e tij dhe kujtimi i tij rroftë përgjithmonë në zemrat tona”, ka shkruar Kostadinov.
