Me miratimin e ndryshimeve në Kodin Rrugor, i hapet rruga dhënies së shërbimti të kolaudimit të makinave nga shteti. Sipas Drejtorisë së Shërbimeve të Transportit Rrugor, kontrolli teknik do të nisë brenda këtij muaji.
Drejtoria e Shërbimit të Transportit Rrugor, e cila do të ofrojë tashmë këtë shërbim pret botimin e ndryshimeve në Fletoren Zyrtare, ndërsa nga ana e Ministrisë së Infrastrukturës dhe Energjisë, pritet të publikohet udhëzimi zbatues për kontrollin e automjeteve por ende nuk e ka një datë të saktë për qytetarët.
Dyert e pikës së kolaudimit në Tiranë vijojnë të jenë mbyllura dhe nën mbikëqyrjen e rojeve të sigurisë.
Afërsisht 1/3 e automjeteve në Shqipëri sot qarkullojnë vetëm me vulën e pagesës së taksës së qarkullimit dhe pa formularin e kolaudimit, ndërsa probleme të shumta ka me automjetet e bizneseve dhe qytetarëve që kërkojnë të udhëtojnë jashtë kufijve dhe pengesë bëhet kolaudimi i mjetit.
Për këtë arsye, shërbimi i kontrollit teknik do të ofrohet më parë për kategoritë më sensitive, transportin publik, taksitë dhe autoshkollat, të cilat e kanë detyrimin për të bërë kolaudim 1 herë në 6 muaj dhe më pas do të publikohen njoftime për kategori të tjera që do të jenë në radhë, në mënyrë që të menaxhohet fluksi i lartë.
Ndërkohë Gonxhja thotë se faza e dytë e kolaudimit do të fillojë për mjetet që përfitojnë nga ndryshimet e Kodit Rrugor të cilat do të njoftohen hap pas hapi nga DPSHTRR dhe në E-Albania.
Me ndryshimet që ka pësuar kodi rrugor janë përcaktuar edhe afatet e reja se kur një mjet do i nënshtrohet kontrollit teknik. Për shembull në rast se ka drejtues mjeti që ju skadon vlefshmëria e certifikatës më 1 qershor 2021 ata nuk do e kryejnë kolaudimin tani por në qershor të vitit 2022. E njëjta gjë do të ndodh për të gjitha automjetet që ju skadon kolaudimi pas rifillimit të këtij procesi. Ndërsa po punohet edhe për udhëzimin përkatës që pritet të dalë në ditët në vijim për rifillimin e këtij procesi.
Ndryshimet në Kodin Rrugor u miratuan në seancën e fundit plenare, dhe tashmë pritet të dekretohen nga Presidenti Ilir Meta që të fillojë menjëherë zbatimi i ligjit. Në rast se presidenti nuk e dekreton ligjin, afati i rifillimit mund të zgjatet, pasi ligji kalon edhe një herë në komisionet parlamentare si dhe për rishikim apo rrëzim dekreti në seancë plenare.
Kolaudimi është pezulluar që në janar për shkak se përfundoi kontrata koncesionare me SGS Automotiv Albania në fund të dhjetorit 2020 që ofronte këtë shërbim dhe kontrolli teknik i kaloi shtetit kontretisht DPSHTRR.
