Nisja e punimeve për ngritjen e një kulle gjigande në qendër të Tiranës kapi ne befasi jo vetëm qytetarët e kryeqytetit, por mbi të gjitha politikën e fjetur të gushtit.
U deshën vetëm disa pastime në rrjetet sociale dhe një dalje e Arlind Qorrit në “vendin e krimit”, për të zgjuar një debat, që në fakt nuk bëhet për kullën në vetvete, por për personat që qendrojnë pas saj.
Dhe ndryshe nga herët e tjera, ajo që bëri përshtypje, ishte kyçja e gojës nga opozita, ose më saktë nga ajo pjesë e opozitës, që e konsideron veten si opozitë e vërtetë, që nuk bën pazare me Ramën dhe nuk shitet.
Bëhet fjalë për opozitën e drejtuar nga Sali Berisha dhe Ilir Meta.
Ata që akuzojnë dhe sulmojnë çdokënd, këtë herë e qepën gojën në mënyrë të çuditshme.
Heshtje që i nxorri zbuluar, si përfitues dhe pazarxhinj të rëndomtë, të cilët ndryshe nga sa thonë, nuk kanë kauza, por thjesht e përdorin opozitën për të vënë gjoba apo për të bërë biznes.
Ndërsa kanë mbi një vit që akuzojnë Lulzim Bashën se bën pazare me Edi Ramën, në fakt tani na del se janë ata që e bëjnë këtë gjë.
Madje jo për ndonjë biznes të rëndomtë, por për një kullë qindra milionë euro.
Vetëm se këtë radhë biznesi iu doli zbuluar dhe i kapi në befasi, sa u deshën mbi 24 orë që të reagonin.
Dhe edhe në këtë rast, thjesht u morën me Ramën, jo me akuzat se pas kësaj kulle qendrojnë ata.
Se që jep e heq leje ndërtimi Edi Rama, këtë e dimë, se është kryeministër.
Ajo që nuk dinim, ose më saktë që nuk shfaqej kaq hapur, ishte fakti që Rama iu jep leje edhe këtyre opozitarëve të përbetuar kundër tij.
Leje nga ato, që mbyll çdo gojë.
Madje dhe gojën e Sali Berishës.
