Edvin Shvarc, djali i përkthyesit të njohur Robert Shvarc, është pushuar nga puna e drejtorit të informimit publik dhe marrëdhënieve me jashtë në Presidencë, ku kishte punuar për 20 vjet me radhë, që nga koha e Alfred Moisiut.
Ai është shkarkuar se nuk ka njehësuar diplomën që ka marrë në Nju Jork me atë në Shqipëri.
Një motiv banal, por kjo është administrata, funksionon me letra të rregullta, ndryshe pastaj do bëhej si mejhanë!
Pas bërjes publike të lajmit, s’mbeti njeri pa shkruar, sidomos nga këta të opozitës, për të treguar çfarë presidenti të keq që kemi, që vete e shkarkon nga puna një njeri që ka 20 vjet aty.
Tani ok, ai mund të ketë qenë shumë i zoti në punën e vet, siç thuhet, por nuk është ndonjë dramë kombëtare, siç po trajtohet, shkarkimi nga puna.
Mund të gjejë punë fare mirë në një vend tjetër, nëse është kaq i zoti, pasi asnjë vend pune nuk është i përjetshëm.
Biles ka ndenjur shumë në atë vend dhe është djegur, nëse është vërtet kaq i aftë, pasi mund të kishte bërë karrierë nëse do të ishte larguar diku tjetër me kohë dhe sot nuk do të njihej vetëm si djali i Robert Shvarc dhe nuk do të përmendej thjesht si shoku i shkollës së Blendi Fevziut.
Por nga administrate janë flakur mijëra vetë, të cilët kanë mbetur pa punë deri kur është ndërruar nga pushteti, pikërisht nga këta që sot qarraviten për fatin e Shvarcit.
Ai me siguri do të gjejë punë shumë shpejt, aq më tepër që ka një diplomë amerikane, por këta që sot ankohen për fatin e tij, mirë do të bënin të kërkonin njëherë falje për ata familjarë që i kanë pushuar thjesht se kanë pasur bindje të tjera politike.
