I ftuar në emisionin Shqip nga Rudina Xhunga, ish-drejtori i Policisë së Tiranës, ish-ministër dhe zv.ministër i Rendit, Bajram Yzeiraj, foli për 2 prillin e 1991.
“Për 2 prillin dënuan një grup prej 18-20 personash. Është dënuar Aredin Shyti, atëherë zv/ministër, vetëm se kishte shkruar një telegram ku thoshte që duhet marrë masa dhe vetëm për aq u dënua 18 vite.
Apo Gjek Çelaj që e kam pasur student. I shkatërruan jetën. Nuk kishte asnjë faj. Të njëjtin fat mund të kisha edhe unë po të ndodhesha në Shkodër. Këtyre individëve iu shkatërrua jeta dhe ende nuk është gjetur se kush ishin ekzekutorët. E dimë që ishte vrasje e organizuar dhe kishin rënë dakord që të vrisnin, por kush ishin ata që vranë në 2 Prill nuk e dimë.
Ngjarja e 2 Prillit në Shkodër nuk kishte pse të ndodhte, sepse PD-ja e kishte fituar atë qytet. Dyshimet e mia janë që 2 Prilli u projektua të ndodhte në Tiranë, në objektin e Partisë Socialiste, por ne e shmangëm duke përhapur dezinformacion, sepse radiot përgjoheshin. Nëpërmjet atyre radiove ne dhamë lajme të rreme për të krijuar idenë se nuk mund të vepronin dot. Ndaj ata u shpërngulën në zonën e tyre, ku e kishin më të lehtë.
Organizatorët e kishin menduar mirë dhe policia bëri shumë përpjekje, por nuk mundi, madje duke rrezikuar edhe jetën e saj. Policia as nuk e mendoi kurrë që do të kishte ato pasoja. Viktima pa faj në turmë dhe viktima nga vetë radhët e policisë me dënimet që u dhanë më pas për ta. Po për 21 Janarin kush u dënua?!”, tha ai.
