Lëvizja Socialiste për Integrim duket se është partia më e shqetësuar nga SPAK dhe reforma në drejtësi. Si PD, si LSI janë të pakënaqura me mënyrën sesi po zbatohet procesi, por partia e presidentit Ilir Meta është më e revoltuara. Të premten Këshilli i Lartë i Prokurorisë zbuloi se në 19 mars do të hapet gara për kryeprokurorin e ri, ndërsa brenda qershorit ngrihet Struktura e Posaçme Antikorrupsion. Por dje kreu i grupit të LSI, Petrit Vasili, ka nisur sulmet ndaj këtij institucioni.
Duke qenë se Gjykata Kushtetuese ka rrëzuar disa nene për funksionimin e KLP, Vasili ka deklaruar se ky organ ka hyrë në rrugën e paligjshmërisë duke mos dhënë asnjë shpjegim për mënyrën se si merr vendimet dhe mbi çfarë nenesh apo rregullash kushtetuese bazohet. “KLP thellohet rrezikshëm në rrugën e paligjshmërisë. KLP thellon paligjshmërinë.
Ka disa pyetje të pakapërcyeshme përpara saj. Si e zhvilloi KLP mbledhjen e saj konstatuese? Si procedoi? Si mori vendime? E mbledhur pa ligj, pasi nenet janë shfuqizuar,duke bërë edhe zgjedhje e marrë vendime brenda vetes, KLP po ecën kundër ligjit dhe jo në krah te tij.
Edhe pse të zgjedhur anëtarët e Këshillit të Lartë të Prokurorisë, dispozita, që rregullon mënyrën e thirrjes dhe mbledhjes së këtij organi kolegjial nuk ekziston, pasi ato rezultojnë të shfuqizuar”, u shpreh ai. Vasili u shpreh se ka mungesë rregullash mbi të drejtat që ka KLP, duke mos u vendosur asnjë akt nënligjor. Ai deklaroi se në bazë të boshllëkut ligjor që është krijuar, nuk mund të miratohet as buxheti.
Vasili tha se nuk ka asnjë përcaktim ligjor për procedimin e një anëtari të KLP nga ana disiplinore, duke shtuar se janë shfuqizuar dispozitat që rregullonin këtë proces. “Ka vakum dhe mungesë rregullash se si ky organ mblidhet dhe nuk ekziston asnjë rregull se çfarë të drejta ka KLP, çfarë aktesh nënligjore mund të vendose. Referuar këtyre mangësive dhe boshllëkut ligjor të krijuar, as buxheti i saj nuk mund të hartohet dhe as të miratohet dot, as akte nënligjore nuk miratohen dot, as procedime disiplinore nuk realizohen dot, as dënime disiplinore nuk jepen dot, as emërime nuk kryhen dot, as transferime nuk realizohen dot.
Nuk ka përcaktim ligjor se si janë përgjegjës dhe çfarë shkeljesh disiplinore, apo si procedohet një anëtar i KLP nga ana disiplinore. Janë shfuqizuar dispozitat që rregullonin këtë proces”, u shpreh Vasili.
Vasili sulmon kreun e KLP
Kryetari i grupit të LSI, Petrit Vasili, përveç sulmeve që ka hedhur në drejtim të KLP, ka akuzuar edhe kryetarin e këtij institucioni. Ai tha se kreu i KLP, Gent Ibrahimi është zgjedhur në mënyrë misterioze dhe se ka organizuar një mbledhje të KLP pa ligj. Vasili u shpreh se Ibrahimi gjatë mbledhjes ka deklaruar që të mos kërkoni masa disiplinore për prokurorët për shkak të mungesës së ligjit. Vasili u shpreh se kreu i KLP nuk interesohet për nenet që mungojnë, duke shtuar se kjo mungesë bën të pamundur mbledhjen e KLP.
“Kryetari i KLP i zgjedhur misteriozisht në një mbledhje KLP të mbledhur pa ligj thotë: “Mos merrni mundimin të vini te KLP-ja dhe të kërkoni disiplinë për prokurorët. Është thjesht e pamundur për shkak të mungesës së ligjit dhe kjo është përgjegjësi e Parlamentit. Politika duhet të mblidhet urgjentisht të miratojë ligjin. Është shumë e vonuar. Nëse politika nuk miraton ligjin, nuk ka asnjë mënyrë për të disiplinuar prokurorët e korruptuar, prokurorët e paaftë”.
Çudi e madhe! Për gjysmat e neneve të shfuqizuara Ibrahimi është në merak dhe bën mirë. Po për gjysmat e neneve,që pamundësojnë mbledhjen e KLP dhe për pasojë e bëjnë zgjedhjen e vet Ibrahimit hiç gjë, përse nuk flet ky i fundit”, u shpreh Vasili.
Elisjeda Kiko
